Қирғизистон президенти Садир Жапаров иккинчи президентлик муддатига номзодини қўйиши тасдиқланди. Бу ҳақда президент матбуот котиби Аскат Алагозовга таяниб, 24.kg хабар берди.
“Мамлакатимиз учун стратегик аҳамиятга эга бўлган узоқ муддатли халқаро лойиҳалар йўлга қўйилаётгани ва режалаштирилаётганини инобатга олсак, Садир Жапаровнинг иккинчи муддатга сайловда иштирок этиши сиёсатдаги изчил қадам бўлади”, — дея изоҳ берди Аскат Алагозов.
Аввалроқ Вазирлар Маҳкамаси раиси ўринбосари Эдил Байсалов “Озодлик радиоси”га берган интервьюсида Садир Жапаровнинг иккинчи муддатга номзодини қўйиш режалари ҳақида маълум қилганди.
“Президентимиз навбатдаги сайловларда иштирок этади. Конституция бунга йўл қўяди. У бошлаган ишини ярим йўлда қолдирмайди. Халқ эса бунга йўл қўймайди. Келгуси уч йилда халқ кўп ютуқларга гувоҳ бўлади”, — деган Байсалов.
Унгача Садир Жапаров ҳам, унинг администрацияси ҳам навбатдаги президентлик сайловларида иштирок этиш бўйича баёнот бермаган эди. 2023 йил декабрь ойи ўрталарида Миллий хавфсизлик давлат қўмитаси раҳбари Қамчибек Ташиев Садир Жапаров иккинчи муддатга сайланишига ишора қилган эди.
Изоҳ (0)