Qirg‘iziston Milliy xavfsizlik qo‘mitasi raisi Qamchibek Tashiyev grek yong‘oqlari qirg‘izlarga tegishli ekanini aytib, uni qirg‘iz yong‘og‘i deb nomlashga chaqirdi.
Tashiyev dunyodagi eng katta yong‘oq o‘rmoni Qirg‘izistonda joylashganini ta’kidladi.
Yong‘oqlar bizda ming yillar davomida o‘sgan va dunyodagi eng katta yong‘oq plantatsiyasi shu yerda joylashgan. Mamlakatimizdan yong‘oq butun dunyoga tarqalgan: uni grek, turk, ispan, venger yong‘og‘i deb ham atashgan, lekin aslida u bizdan kelib chiqqan. Menimcha, bundan buyon biz uni qirg‘iz yong‘og‘i deb atashimiz lozim.
Ayniqsa, mahalliy hokimiyat organlari, viloyat hokimlari, tuman hokimlari, Favqulodda vaziyatlar vazirligi, O‘rmon xo‘jaligi shunday atashi kerak. Shunda biz tarixiy adolatni tiklaymiz. Biz — qirg‘izlar — o‘zimizni ulug‘lashni bilmaymiz, grekcha bo‘lsa, yaxshi deb o‘ylaymiz. Yo‘q, unday emas. “qirg‘iz yong‘og‘i” brendini yaratishimiz zarur, dedi Tashiyev.
31-mart kuni Jalolobod viloyatida 100 gektar maydonga 40 ming tup ko‘chat ekildi. Tashiyevning yuqoridagi bayonoti aynan shu tadbirda yangradi. U kelajakda bu ko‘chatlar haqiqiy o‘rmonga aylanishini aytdi.
Biz o‘zligimizni, qadriyatimizni yerga urdik. Hozir farzandlarimiz, nevaralarimiz ulg‘ayyapti, biz ularga eng qimmatli narsalarni meros qilib qoldirishimiz kerak. 50 yildan keyin bu joyda nevara-chevaralarim o‘ynaydi. Nevaralar: “Bu daraxtlarni ota-bobolarimiz o‘tqazgan” deydi. Barcha avlodlarimiz shunday deydi, deya xulosa qildi Tashiyev.
Jalolobod viloyatining 100 gektar cho‘l hududida 7 turdagi, jumladan, yong‘oq, pista, bodom, olma, qarag‘ay, o‘rik, shuningdek, ignabargli va bargli daraxtlarning 40 ming tup ko‘chati ekilmoqda.
Izoh (0)