“Футбол ТВ” ҳамда “Спорт ТВ” кучли бешлик чемпионатларини трансляция қилади

Ўзбекистон Миллий телерадиокомпанияси (МТРК) тасарруфидаги “Спорт ТВ” ва “Футбол ТВ” телеканаллари Европанинг кучли бешлик чемпионатлари — Испания Ла Лигаси, Франция Лига 1, Италия А Серияси ҳамда Германия Бундеслигаси трансляция ҳуқуқини қўлга киритди. Бу ҳақда журналист Отабек Жўраев ўзининг Telegram-каналида маълум қилди.

Манбанинг қўшимча қилишича, янги мавсумдан бошлаб ушбу телеканаллар нафақат мазкур тўрт чемпионатни, балки Италия кубоги, Англия кубоги каби нуфузли турнирларни ҳам тўғридан-тўғри эфирда намойиш этади.

Шунингдек, ноябрь ойида Қатарда бўлиб ўтадиган 17 ёшгача бўлган футболчилар ўртасидаги Жаҳон чемпионати, Осиё Чемпионлар Лигаси, ҳамда 2026 йилда АҚШ, Мексика ва Канада мезбонлик қиладиган катталар ўртасидаги Жаҳон чемпионати ҳам “Спорт ТВ” ва “Футбол ТВ” орқали трансляция қилинади.

Эслатиб ўтамиз, аввалроқ “Сетанта Спортс” телеканали Англия Премьер Лигаси учрашувларининг Ўзбекистондаги трансляция ҳуқуқини 2030 йилгача сотиб олгани ҳақида хабар берилган эди. Бундан ташқари, кучли бешлик чемпионатларининг (Ла Лига, Бундеслига, А Серия, Лига 1) қолганлари ҳам катта эҳтимол билан айнан шу телеканалда эфирга узатилишда давом этади.