Қирғизистон президенти Садир Жапаров бош вазир Оқилбек Жапаров ва яна бир қанча мансабдор шахсларга ўқитувчилар учун сифатсиз ноутбуклар харид қилинганига ҳайфсан берди.
Бу ҳақида Қирғизистон раҳбари матбуот хизмати маълум қилди.
Оқилбек Жапаров ва унинг ўринбосари Эдил Байсалов “Таълим вазирлиги томонидан умумтаълим мактаблари ўқитувчилари учун сифатсиз ноутбуклар харид қилиш вақтида ўзларига юкланган хизмат вазифаларини лозим даражада бажармаганликлари учун” ҳайфсан билан жазоланган.
Шунингдек, таълим ва фан вазири Доғдурқул Кендирбоева, вазир ўринбосари Лира Самиқбоэва, Президент Администрациясининг бўлим мудири Жипариса Рисбекова, Президент қарорларини тайёрлаш бўлимининг бош эксперти Медербек Омурбековга ҳам ҳайфсан берилган.
Аввалроқ Қирғизистон Миллий хавфсизлик давлат қўмитаси ходимлари томонидан икки марта мамлакат президенти Садир Жапаровга уюштирилган суиқасднинг олди олингани хабар берилганди.
“Улар ҳатто мен ўтадиган йўлни портлатиб юборишга тайёргарлик кўришган эди. Махсус хизматлар ва полициянинг ҳушёрлиги уларнинг режаларини амалга оширишга имкон бермади”, деган мамлакат Миллий хавфсизлик давлат қўмитаси раҳбари Қамчибек Ташиев.
Изоҳ (0)