ChatGPT асосчиси Сем Алтман 10 август куни одамларнинг ҳаётдаги энг муҳим қарорларини OpenAI ёрдамида қабул қилаётгани юзасидан хавотир билдирди. Бу ҳақда Business Insider хабар берди.
Сем Алтман сунъий интеллект (СИ) борасидаги хавотирлари билан улашиб, Х ижтимоий тармоғида шундай пост қолдирган:
“Аксар одамлар ChatGPTъни психолог ёки ҳаётий мураббий сифатида ишлатади, ҳатто ўзлари буни шундай деб атамасалар ҳам. Келажакда ҳам кўпчилик энг муҳим қарорларини сунъий интеллект маслаҳатига таянган ҳолда қабул қилиши мумкин. Бу яхши бўлиши ҳам мумкин, лекин бу мени хавотирга солмоқда”.
Унга кўра, OpenAI фойдаланувчиларнинг сунъий интеллект моделларига қанчалик боғланаётганини ва эски версиялар ўчириб ташланганда қандай муносабат билдиришини диққат билан кузатмоқда. Алтман сунъий интеллект технологиялари, жумладан ChatGPT, одамларнинг ўзига зарар етказишига сабаб бўлиши мумкинлигини ҳам таъкидлаган.
“Кўпчилик фойдаланувчилар ҳақиқат, хаёлот ёки рол ўйнашни ажрата олади, бироқ бундай қила олмайдиганлар ҳам бор. ChatGPT’ни узоқ муддат ишлатиш инсон саломатлигига, хусусан, ақлий фаолиятга зарар етказади”, деди Алтман.
Шунингдек, у сўнгги версия GPT-5 ишга туширилгач айрим фойдаланувчилар томонидан билдирган норозиликларга ҳам тўхталиб ўтган. Унинг айтишича, баъзилар СИнинг эски моделини қайта тиклашни сўраган. Аксарият шикоятчилар янги модел “зерикарли” оҳангда жавоб бераётгани ва ижодкорлик етишмаётганини танқид қилмоқда.
OpenAI ишга туширилганидан бери унга ўзгартиришлар киритилиб келинади. Масалан, апрель ойида GPT-4o’га киритилган янгиланиш бекор қилинган, чунки модел фойдаланувчиларга ҳаддан ташқари “хушомадгўй” жавоблар бера бошлаган эди.
Изоҳ (0)