Қирғизистонда божхона хизмати раҳбарининг собиқ ўринбосари Райимбек Матраимов ва октябрь ойида ўлдирилган криминал авторитет Қамчи Кўлбоевнинг уюшган жиноий гуруҳига алоқадор турли даражадаги 180 дан ортиқ давлат хизматчиси ўз лавозимларидан четлаштирилди. Бу ҳақда Kloop республика Миллий хавфсизлик давлат қўмитаси (МХДҚ) матбуот марказига таяниб хабар берди.
Бошқарма маълумотларига кўра, бугунги кунга қадар жами 226 нафардан ортиқ давлат хизматчиси фош этилган. Божхона органларида 85 нафар ходим аниқланиб, улардан 76 нафарига яқини ишдан бўшатилди, Ички ишлар вазирлигида 26 нафар шахс аниқланиб, улардан 14 нафари мансабидан четлаштирилди, маҳаллий Кенгашнинг 6 нафар депутати ўз мандатларини топширди, 65 нафар фуқаро туман давлат ҳокимияти ва бошқаруви органлари ҳамда ўзини ўзи бошқариш органларидаги лавозимидан четлаштирилди. Яна бир қатор бошқарма ходимлари ҳам ишдан бўшатилди.
Давлат органларини ғаразли мақсадларни кўзлаган виждонсиз ходимлардан тозалаш бўйича бундай ишлар давлатимизнинг барча жабҳаларида бундан кейин ҳам давом эттирилади, — дейилади Миллий хавфсизлик давлат қўмитаси хабарида.
Ноябрь ойи бошида МХДҚ раҳбари Қамчибек Ташиев Қирғизистонда уюшган жиноий гуруҳларга алоқадорлик, коррупция ва бошқа қонунбузарликлар учун 202 нафар давлат хизматчиси лавозимидан маҳрум этилишини маълум қилганди.
Бугунги кунда Райимбек Матраимовга алоқадор 92 нафар, Кўлбаевга алоқадор 60 нафар ходимни аниқладик. Бундан ташқари, 50 нафар божхона ходими аниқланди. Жами 202 нафар давлат хизматчиси жиноий тузилмалар ва уюшган жиноий гуруҳлар билан алоқадорлик, шунингдек, коррупцияга алоқадорлик учун ишдан олинади, — деди Ташиев.
“Райим-миллион” лақаби билан таниш Матраимов 2015 йилдан 2017 йилгача Қирғизистон божхона хизмати раҳбари ўринбосари лавозимида ишлаган. Умуман олганда, у божхона тузилмасида 10 йилдан ортиқ фаолият юритган. Бу вақт ичида у хитойлик тадбиркор Ҳабибула Абдуқодирнинг яширин клани билан биргаликда коррупция схемасини тузган. Матраимовнинг контрабандага алоқадорлиги журналистик текширувда маълум қилинган.
Қирғизистонда 2020 йил октябрь ойида ҳокимият алмашганидан сўнг Миллий хавфсизлик давлат қўмитаси божхонадаги коррупция бўйича тергов бошлади, унга Матраимов ҳам алоқадор сифатида тортилди. 2021 йил февраль ойида собиқ амалдор “Коррупция” моддаси бўйича судланди. Матраимов тергов билан шартнома тузиб, давлатга 2 миллиард сом (24 миллион доллар) тўлагани туфайли қамоқдан қутулиб қолди.
Қамчибек Кўлбоев — Қирғизистондаги энг машҳур криминал “босс”лардан бири эди. АҚШ разведка идоралари уни дунёдаги энг йирик наркобаронлар қаторига киритган. Кўлбоевни ҳибсга олиш ёки унинг уюшган жиноий гуруҳи “молиявий оқимини бузиш”га ёрдам берадиган маълумот учун 5 миллион доллар мукофот эълон қилинган.
Кўлбоев 4 октябрь куни хавфсизлик кучларининг махсус амалиёти чоғида ўлдирилган. Эртаси куни Ташиев уюшган жиноий гуруҳ аъзоларини “жамиятга қарши бош кўтармоқчи бўлган” ҳар қандай шахс қаттиқ жазоланишидан огоҳлантирди.
Изоҳ (0)