Россия президенти администрацияси раҳбари ўринбосари Дмитрий Козак Украинадаги урушни тўхтатишни ва музокараларни бошлашни таклиф қилди. Бу ҳақда Кремлга яқин бир нечта манбаларга таяниб, The New York Times хабар берди.
Манбаларга кўра, Козак президент Владимир Путинга жангларни тўхтатиш режасини тақдим этган. У Россияда ички ислоҳотлар ўтказишни, куч тузилмаларини ҳукумат назоратига ўтказишни ва мустақил суд тизимини яратишни таклиф қилган.
Козак узоқ йиллар муҳим давлат лойиҳаларини бошқарган бўлса-да, сўнгги пайтларда Кремль ичида таъсирини йўқотиб бормоқда. Унинг кўплаб ваколатлари Украинага нисбатан қатъий позицияни қўллаб-қувватлайдиган ва босиб олинган ҳудудларни бошқаришда фаол иштирок этаётган Сергей Кириенкога ўтган. Шунга қарамай, Козак Украинадаги урушга норасмий равишда қарши чиқиши билан танилган кам сонли юқори лавозимли амалдорлардан бири ҳисобланади.
Таъкидланишича, Козак Украинага кенг кўламли ҳужум олдидан Путинни қароридан қайтаришга уринган. У президентни ҳужум оқибатлари, Украина армияси ва жамиятининг қатъий қаршилиги ҳақида огоҳлантирган.
Уруш бошланганидан кейин эса у ўт очишни тўхтатиш бўйича келишув тузишга уринган, бироқ Путин бу таклифларни рад этган, дейилади хабарда.
Шундай бўлса-да, Козак Путин билан алоқа ўрнатиш имкониятини сақлаб қолган. У Ғарб вакиллари билан норасмий мулоқотларда қатнашишда давом этмоқда. Ғарб манбаларига кўра, Козак ўз ҳамкорларидан бир неча бор Путинни урушни тўхтатишга кўндиришга ёрдам берадиган далиллар ва таклифлар сўраган. Мутахассислар Путиннинг атрофида қатъий позицияни қўлловчи шахслар устунлиги сабабли Козакнинг таъсири чекланганини айтмоқда.
Бироқ унинг жангларни тўхтатишга чақируви Россия ҳокимияти ичида можарони тинч йўл билан ҳал қилиш тарафдорлари ҳам борлигини кўрсатади, деб ёзмоқда The New York Times.
Изоҳ (0)