Исроил армияси гаровга олинганларни қайтариш бўйича келишувни амалга оширишга тайёргарлик кўрмоқда. Бу ҳақда Исроил бош вазири маслаҳатчиси Дмитрий Генделман ўзининг Telegram каналида маълум қилди.
“Келишувни амалга ошириш доирасида Исроил армияси тасдиқланган оператив режага мувофиқ ҳаракат қилади. Армия ҲАМАС қўлидан озод этилиши кутилаётган гаровга олинганларни қабул қилишга тайёрланмоқда”, дейилади хабарда.
Расмий, шунингдек, Исроил ҳарбийлари “Исроил фуқаролари, айниқса чегарадош ҳудудлар аҳолиси хавфсизлигини таъминлаш чораларини кўришда давом этишини” таъкидлади. Генделман озод этилганларга ҳар томонлама — ҳам жисмоний, ҳам руҳий ёрдам кўрсатилишини айтди.
Ғазо секторида ўт очишни тўхтатиш жорий йилнинг 19 январь куни маҳаллий вақт билан соат 8:30 да бошланади. 17 январь куни Исроил ва ҲАМАС АҚШ ва Қатар воситачилигида гаровга олинганларни озод қилиш тўғрисидаги битимни имзолагандилар.
Миср ТИВ келишувнинг биринчи босқичида Исроил 1890 нафар фаластинлик маҳбусни, ҲАМАС бунга жавобан 33 нафар гаровга олинганларни озод қилиши ҳақида хабар берди.
42 кун давом этадиган биринчи босқичда ҲАМАС Исроил томонидан 1890 дан ортиқ маҳбусни озод қилиш эвазига 33 нафар гаровга олинганларни озод қилади, дейилади хабарда.
Ўз навбатида, Нетаньяху ҳукумат ҲАМАСдан озод қилиниши керак бўлган гаровдагилар рўйхатини ҳали олмаганлигини маълум қилди.
Келишилганидек, озод этиладиган гаровдагилар рўйхатини олмагунимизча келишув бўйича олдинга силжимаймиз. Исроил битимнинг бузилишига йўл қўймайди. Бунинг тўлиқ жавобгарлиги ҲАМАСнинг зиммасида, деди Исроил бош вазири.
Исроил ва ҲАМАС ўртасидаги келишувга кўра, ҲАМАС айирбошлашдан 24 соат олдин озод қилинадиган гаровдагиларнинг исмлари рўйхатини тақдим этиши керак.
2023 йил 7 октябрда ҲАМАС жангарилари Исроил ҳудудига бостириб кириб, 253 кишини ўғирлаб, анклавга олиб кетган. Бунга жавобан Исроил ҳаракатни тор-мор қилиш ва унинг инфратузилмасини йўқ қилиш мақсадида ҳарбий операция бошлаганини эълон қилди. Ғазо соғлиқни сақлаш вазирлиги маълумотларига кўра, Исроил армияси операцияларида 46 899 нафар фаластинлик ҳалок бўлган.
Изоҳ (0)