Исроил ҲАМАС билан Ғазо секторида ўт очишни тўхтатиш бўйича келишув доирасида 90 нафар фаластинлик маҳбусни қамоқдан озод қилди. Бу ҳақда Associated Press хабар берди.
Иордан дарёсининг ғарбий соҳилида жойлашган Офер ҳарбий қамоқхонаси ҳудудидан ойналари қорайтирилган иккита автобус чиқиб кетган. Гап Иордан дарёсининг ғарбий соҳилида яшовчи 78 нафар ва Шарқий Қуддусда яшовчи 12 нафар фаластинликнинг озод қилингани ҳақида кетмоқда.
Улар орасида 70 нафар аёл, шу жумладан, бир нафар вояга етмаган қиз, 8 нафар вояга етмаган ўғил бола ва нисбатан кичик ҳуқуқбузарликлар учун судланган 12 нафар эркак бор.
ҲАМАС Исроилга уч нафар гаровдаги аёлни қайтарди
Бундан бир неча соат олдин Фаластин ҳаракати исроиллик уч нафар гаровга олинган аёлни озод қилди: 24 ёшли Роми Гонен, 28 ёшли Эмили Дамари ва 31 ёшли Дорон Штайнбрехер. Улар урушаётган томонлар ўртасидаги битимнинг биринчи босқичини бажариш доирасида Халқаро Қизил Хоч Қўмитасига топширилганди.
Исроил армияси маълумотларига кўра, улар ҳарбий хизматчилар ва хавфсизлик кучлари ходимлари ҳамроҳлигида Исроилга олиб кетилган, уларнинг аҳволини баҳолаш учун тиббий кўрикдан ўтиш кутилмоқда.
236 нафар фаластинлик маҳбус дарҳол учинчи мамлакатларга кетади
Исроил ва ҲАМАС ўртасидаги келишув шартларига кўра, биринчи босқичда 737 нафар фаластинлик маҳбус озод қилинади. Уларнинг 296 нафари умрбод қамоқ жазосига ҳукм қилинган. Шу билан бирга, 236 нафар фаластинлик озодликка чиққач, дарҳол учинчи мамлакатларга — “асосан Қатар ёки Туркияга” жўнатилади.
Изоҳ (0)