“Манчестер Сити” клуби “Барселона” ярим ҳимоячиси Педрига жиддий қизиқиш билдирмоқда. Бу ҳақида Эл Наcионал нашрига таяниб Championat хабар бермоқда.
Инглиз клубининг бош мураббийи Хосеп Гвардиола 22 ёшли испаниялик футболчини ўз жамоасида кўришни хоҳламоқда. Манбаларга кўра, “шаҳарликлар” Педри учун 100 миллион евро таклиф қилишга тайёр. Сабаби ёзда Кевин Де Брюйне жамоани тарк этиши мумкин. Шу боис клуб белгиялик футболчига ўринбосар қидирмоқда.
Бироқ, “Барселона” президенти Жоан Лапорта бу таклифни қабул қилиш ниятида эмас. У Педри фақат ўзи жамоани тарк этишни истаса, трансфер амалга ошиши мумкинлигини таъкидлаган.
2025 йил январь ойида Педри каталонияликлар билан 2030 йилгача мўлжалланган янги шартнома имзолаган эди. Янги келишувда унинг товон пули 1 миллиард евро этиб белгиланган. Ҳозирча футболчининг ўзи “Барселона”дан кетиш истагини билдирмаган. У жамоанинг етакчиларидан бири бўлишини истамоқда.
Маълумот учун, жорий мавсумда Педри барча мусобақаларда 43 ўйинда майдонга тушиб, 5 гол ва 7 голли узатма муаллифига айланди.
Изоҳ (0)