“Манчестер Сити” 2024/25 йилги мавсум Европа Чемпионлар Лигаси йўлланмасини қўлга киритгач, катта трансферларни амалга оширишни мақсад қилган. “Шаҳарликлар”нинг асосий мақсади — Ла Лиганинг энг иқтидорли футболчиларидан бири Нико Уильямс.
Испания терма жамоаси аъзоси чемпионлик учун курашувчи ва Чемпионлар Лигаси ғолиблигига даъвогар жамоа таркибига қўшилишни истамоқда. Шу боис унинг “Манчестер Сити”га трансфери амалга ошиш эҳтимоли анча юқори. Пеп Гвардиола ҳам Уильямсни жамоага олиб келиш ғоясини маъқуллагани айтилмоқда. Ҳозирда “шаҳарликлар” қийин кунларни бошдан ўтказмоқда, аммо таркиб сифати бўйича ҳали ҳам Европанинг энг кучлиларидан бири ҳисобланади.
Жек Грилишнинг барқарор ўйин намойиш эта олмаётгани ва Кевин де Брюйне MLS ёки Саудия Про Лигасига йўл олиши мумкинлиги сабабли чап қанотда Уильямс асосий футболчилардан бири бўлиши кутилмоқда. Бундан ташқари, “Сити”нинг ҳужумкор тактикаси Нико учун мос келиши тахмин қилинмоқда.
Футболчининг шартномасидаги товон пули 62 миллион еврони ташкил қилади. Агар футболчи “Манчестер Сити”га ўтишга рози бўлса, инглиз клуби ушбу суммани тўлашга тайёр эканлигини билдирган.
Маълумот учун, Нико Уильямс жорий мавсум Ла Лига доирасидаги 34 та учрашувда майдонга тушиб, 4 та гол ва 5 та голли узатма муаллифига айланган. Унинг “Атлетик” билан шартномаси 2027 йил ёзига қадар амал қилади.
Изоҳ (0)