Тошкент шаҳрида 744,2 млн сўмлик табиий газдан ноқонуний фойдаланганлик ҳолати фош этилди. Бу ҳақда Прокуратура департаменти ахборот хизмати хабар берди.
Унда келтирилишича, ҳолат Бош прокуратура ҳузуридаги департаментнинг Юнусобод тумани бўлими томонидан ўтказилган терговга қадар текширувда аниқланган. Фуқаро А.И.га тегишли хонадонда яшаб келаётган фуқаролар С.Ш. ва Б.А. ўзбошимчалик билан табиий газ тармоғига уланиб, 744,2 млн сўмлик газдан ноқонуний фойдаланган.
Мазкур ҳолат юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) жиноят иши қўзғатилиб, тергов ҳаракатлари ўтказилмоқда.
Газ ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Изоҳ (0)