Тошкент шаҳрида 440 млн сўмлик табиий газдан ноқонуний фойдаланган иссиқхона аниқланди, деб хабар бермоқда “Ҳудудгазтаъминот”.
Келтирилишича, “Ҳудудгазтаъминот” АЖ Бошқарув раисининг тегишли топшириғи билан республиканинг барча ҳудудларида табиий газдан ноқонуний фойдаланиш ҳолатларини аниқлаш бўйича назорат тадбирлари давом эттирилмоқда.
Тошкент шаҳар Сергели туманида “Ҳудудгаз Пойтахт” газ таъминоти филиали комплаенс назорат тузилмалари, Ўзэнергоинспекция ходимлари ва ҳуқуқ-тартибот органлари ҳамкорлигида ўтказилган рейд жараёнида қонун бузилиши ҳолати фош этилди.
Сергели тумани Само кўчасида истиқомат қилувчи фуқаро ўз хонадонида иссиқхона ташкил қилган ҳолда табиий газ тармоғига резина шланг орқали уланиб, “зангори ёқилғи”дан ноқонуний фойдаланиб келаётгани маълум бўлди. Ҳолат юзасидан тегишли тартибда далолатнома тузилиб, сарфланган табиий газ ҳажми қайта ҳисоб-китоб қилинди ва 440 миллион 967 минг сўмлик зарар аниқланди.
Ноқонуний ҳолат бўйича барча ҳужжатлар ҳуқуқни муҳофаза қилувчи органларга юборилди.
Газ ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Изоҳ (0)