Жиззах вилоятида 2 млрд сўмлик табиий газдан ўғринча фойдаланган корхона аниқланди, деб хабар бермоқда “Ҳудудгазтаъминот”.
Қайд этилишича, барча ҳудудларда табиий газдан ноқонуний фойдаланиш ҳолатларини аниқлаш ва ҳуқуқбузарликларни олдини олишга қаратилган тезкор тадбирлар давом эттирилмоқда.
“Ҳудудгаз Жиззах” газ таъминоти филиали комплаенс назорат тузилмалари, туман газ таъминоти бўлими ходимлари ва ҳуқуқ-тартибот органлари ҳамкорлигида Жиззах вилояти Ғаллаорол туманида ўтказилган мана шундай рейд вақтида қонун бузилиши ҳолати фош этилди.
Туманнинг “Кўкбулоқ” МФЙда жойлашган “Ф.Т.М.” МЧЖга қарашли ҳудуд хатловдан ўтказилганда, истеъмолчи электрон газ ҳисоблаш ускунасига ўрнатилган бир марталик тамғани ўзбошимчалик билан олиб ташлаб, табиий газдан ноқонуний фойдаланиб келаётгани аниқланди.
Ҳолат юзасидан далолатнома тузилиб, газ сарфи қайта ҳисоб-китоб қилинди ва 2 миллиард 46 миллион сўмлик зарар аниқланди. Ноқонуний ҳолат бўйича барча ҳужжатлар ҳуқуқни муҳофаза қилувчи органларга юборилди.
Газ ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Изоҳ (0)