Туркиянинг йирик шаҳарларида 2028 йилги президентлик сайловларида мухолифат номзоди сифатида эълон қилиниши арафасида қамоққа олинган Истанбул мэри Экрем Имомўғлининг ҳибсга олинишига қарши намойишлар тақиқланди.
Маълумотларга кўра, 19 март куни қамоққа олинган Имомўғли жиноий ташкилотга раҳбарлик қилиш ва коррупцияда айбланмоқда.
Anadolu давлат ахборот агентлиги хабар қилишича, сиёсатчига нисбатан террорчилик иши бўйича тергов олиб борилмоқда. Хусусан, у Туркияда тақиқланган Қурдистон ишчи партиясини қўллаб-қувватлаганликда айбланмоқда. Анқара мерни таъқиб қилишнинг сиёсий сабабларини рад этмоқда.
Умуман олганда, Туркия прокуратураси 100 дан ортиқ кишини, жумладан, Истанбул маъмуриятининг юқори лавозимли ходимларини қамоққа олиш учун ордер берган.
2024 йилда Туркияда бўлиб ўтган маҳаллий сайловларда мухолифат номзодлари Анқара ва Истанбулда Эрдоғон номзодларини мағлуб этганди.
Имомўғлининг қамоққа олиниши бутун мамлакат бўйлаб, жумладан, мамлакатнинг энг йирик шаҳри Истанбул ва пойтахт Анқарада норозилик намойишларига сабаб бўлди. Шу муносабат билан Истанбул вилояти маъмурияти “бутун вилоятда жамоат тартибини сақлаш ва эҳтимолий ғалаёнларнинг олдини олиш” мақсадида 23 мартгача йиғилишлар ва намойишлар ўтказишни тақиқлади. Баъзи марказий кўчалар ёпилди ва норозилик намойишлари полиция томонидан тарқатиб юборилди, жумладан, кўздан ёш оқизувчи газдан фойдаланилди.
Истанбулдан сўнг Туркиянинг бошқа шаҳарлари ҳам намойишларни тақиқлади. Анқарада намойишлар ва йиғилишлар ўтказишга қўйилган тақиқ сешанбагача (25 март) беш кун давом этади. Шунингдек, Измир порт шаҳри ҳокимлиги ҳам шундай қарор қабул қилгани ҳақида маълум қилди.
Изоҳ (0)