Россия бош вазири Михаил Мишустин 19 январь куни Туркманистон-Россия форумида қатнашиш учун ишчи ташриф билан Ашхободга келди, деб ёзади «Коммерсантъ».
У икки томонлама ҳамкорликнинг асосий йўналишларини белгилаб берди, хусусан, айни пайтда бор-йўғи 1 миллиард долларга баҳоланаётган товар айланмасини кенгайтириш зарурлигини қайд этди.
Москва ҳам, Ашхобод ҳам, Туркманистоннинг транзит салоҳиятини ҳисобга олган ҳолда, савдо ҳажмини ошириш учун урғуни логистикани ривожлантиришга беришни режалаштирмоқда.
Мишустин таъкидлашича, Москва ва Ашхобод ўртасидаги ҳамкорликни ривожлантиришда ҳозирги «ностандарт шароитларда» янги имкониятлар мавжуд: Туркманистон бизнеси Россия бозорида у ерни Ғарб компаниялари тарк этганидан кейин «бўшаб қолган» баъзи жойларни эгаллаши мумкин.
Ўз навбатида, Россия Иқтисодиёт вазирлиги маълумотларига кўра, айни пайтда Россия бизнеси Туркманистонда жами 3,5 миллиард долларлик 20 та инвестиция лойиҳаларида қатнашмоқда.
Эслатиб ўтамиз, Туркманистон ва Россия президентлари Сердар Бердимуҳамедов ва Владимир Путин 17 январь куни телефон орқали суҳбатлашган эди. Улар Россия-Туркманистон стратегик шериклиги бўйича эришилган даражани юқори баҳолаб, энергетика соҳасидаги амалий ҳамкорлик бўйича бир қатор муайян масалаларни муҳокама қилган.
Аввалроқ Туркманистон бош вазири ўринбосари Шоҳим Абдураҳмонов мамлакатда биринчи ерости газ омбори қурилишини маълум қилган эди. Унинг сўзларига кўра, газ омбори «товар гази захираларини таъминлаш учун» қурилади.
Табиий газ захиралари бўйича Туркманистон Россия, Эрон ва Қатар билан биргаликда дунёнинг биринчи тўртлигига киради.
2019 йил апрелида «Газпром» Туркманистон билан шартномали алоқалар қайта тикланганини маълум қилди, муносабатлар 2016 йилда бир томонлама тартибда бекор қилинган эди. Ўша йилиёқ Россия компанияси Туркмангаз» давлат компаниясида табиий газ сотиб олиш бўйича шартнома тузди. Унинг доирасида «Газпром» йилига 5,5 миллиард куб метр газ олади.
Изоҳ (0)