Россия табиий газини Қозоғистон ва Ўзбекистонга экспорт қилиш октябрда бошланади, деб хабар берди “ТАСС” Россия президенти Владимир Путинга таяниб.
Бу ҳақда Путин 5-октябр куни “Валдай” клубининг ялпи мажлисида маълум қилди. У газ экспорти Марказий Осиё мамлакатлари иқтисодиёти учун катта аҳамиятга эга эканини таъкидлади.
“Техник жиҳатдан бу аллақачон амалга оширилган, (газни) тўлиқ етказиб бериш жорий йилнинг октябр ойида бошланади”, — деди Путин. “Ҳозирча кичик ҳажмда, лекин бу Қозоғистон иқтисодиёти учун ҳам, Ўзбекистон иқтисодиёти учун ҳам жуда муҳим. Ҳар бирига 3 миллиард кубометр етказиб берамиз, кейинчалик кўпайтиришимиз мумкин”.
Путин Россиядан Қозоғистон ва Ўзбекистонга газ етказиб беришни ташкил этиш учун ҳар уч мамлакатда газ узатиш тизимларини тиклаш ва қайта конфигурация қилиш талаб этилганини қўшимча қилди.
Хусусан, СССР даврида ўрнатилган қувурларда қарама-қарши йўналишда газ юбориш учун уларни мослаштириш керак эди. Қозоғистон ва Ўзбекистон ўз ҳудудида, “Газпром” эса Россияда тегишли режаларни ишлаб чиқди ва амалга оширди.
Россия ва Марказий Осиё ўртасидаги кун тартибида энергетика ва сув ресурсларини бошқариш бўйича бошқа масалалар ҳам бор. Россия раҳбари уларни “иқтисодий ва молиявий нуқтаи назардан қийин, аммо ечими бор” деб таърифлади.
Россиядан Ўзбекистон ва Қозоғистонга газ экспорти
2022 йил ноябрда Россия Ўзбекистон ва Қозоғистон иштирокида “газ иттифоқи” тузишни таклиф қилган эди. Унинг мақсадлари орасида ОАВ газ транзити ва уни бошқа бозорларга, хусусан, Хитойга етказиб беришни мувофиқлаштиришни келтирди.
Январь ойида Ўзбекистон ва Қозоғистон энергетика вазирликлари “Газпром” билан ҳамкорлик режаларини имзолади. Дастлаб, 1 мартдаёқ Россия гази транзитини йўлга қўйиш режалари ҳақида хабар берилганди, бироқ инфратузилма бунга тайёр бўлмаган.
Қозоғистон энергетика вазири Алмасадам Саткалиев июнь ойи бошида қувурларни 2024 йил куз-қиш мавсумига тайёрлаш муддатини белгилаб берди. Кўп ўтмай Ўзбекистон ва Россия газ етказиб бериш бўйича келишувни расмийлаштирди.
“ЎзГазTrade” ва “Газпром Экспорт” ўртасида бир вақтда тузилган шартнома шартларига кўра, йилига 2,8 миллиард куб метргача газ етказиб берилади. Август ойида Қозоғистон Россиядан Ўзбекистонга 1,5 дан 10 миллиард куб метргача газ етказиб бериш масаласини муҳокама қилаётгани ҳақида хабар берилди.
Октябр бошида Ўзбекистон Энергетика вазирлиги матбуот хизмати мамлакат инфратузилмаси Россия газини қабул қилишга тайёрлиги ҳақида хабар қилди. Саткалиевнинг айтишича, Қозоғистон октябр ойи охиригача транзитни йўлга қўйишни кутмоқда.
Изоҳ (0)