Ўзбекистон жорий йилнинг 1-октябридан Россиядан газ импорт қилишга тайёр. Бу ҳақда “Дарё”га Энергетика вазирлиги матбуот котиби Ҳасан Тошхўжаев маълум қилди.
Фото: “Дарё”
Ҳасан Тошхўжаевга кўра, Ўзбекистон инфраструктураси Россия газини қабул қилиб олишга тайёр.
“Импорт жараёни жуда мураккаб. У фақат Ўзбекистонга боғлиқ эмас. Ўртада транзит давлат ҳам бор. Мен фақат ўз тарафимиздан гапириб, Ўзбекистон инфраструктураси Россия газини қабул қилиб олишга 100 фоиз тайёрлигини айта оламан, холос. Лекин айни санадан газни қабул қиламизми ёки йўқ, бу борада аниқ маълумотга эга эмасман. Айта оладиганим — биз Россия газини қабул қилишга тизимни тайёрлаганмиз ва қувурларимиз юқори босимли газни қабул қилиб олишга тайёр”, —дея маълум қилди вазирлик матбуот котиби.
Жорий йил 16 июнда тузилган шартномага мувофиқ, 1-октябрдан Россия Ўзбекистонга газ экспорт қилишни бошлайди. Газ олди-сотдиси бўйича шартнома “УзГазтраде” АЖ ва “Газпром экспорт” МЧЖ ўртасида 2 йил муддатга тузилган.
“Шартнома тўлиқ тижорий шартларда ишлаб чиқилиб, республикамиз истеъмолчиларининг табиий газга бўлган йилдан йилга ошиб бораётган эҳтиёжини қисман қондириш ҳамда куз-қиш мавсумини беталафот ўтказишга қаратилган чора-тадбирлардан биридир. Шартнома доирасида жорий йилнинг 1-октябридан кунига 9 миллион кубометр табиий газни импорт қилиш бошланиши мўлжалланмоқда. Йиллик ҳажм эса қарийб 2 миллиард 800 миллион кубометрни ташкил этади”, — дея хабар берган Ўзбекистон Энергетика вазирлиги.
Аввалроқ “Дарё” мухбирининг мазкур сўровига жавобан, Энергектика вазирлиги “Россиядан сотиб олинаётган газ қиш фаслида Ўзбекистон эҳтиёжининг етишмаётган қисмини қоплайди”, — дея жавоб қайтарган. Аммо Россия гази неча пулдан сотиб олинаётгани ҳалигача очиқланмаган. Энергетика вазири Жўрабек Мирзамаҳмудов Ўзбекистон Россияга газ учун қанча тўлашини очиқлай олмаслиги, лекин нархни белгилашда миллий манфаатлардан келиб чиқилганини айтган.
Изоҳ (0)