Бугундан (1-октябрь) кучга кирган бизнес учун янги энерготарифлар доирасида газ заправкаларида бир куб метр метан 3250 сўмдан сотилмоқда. Бу ҳақда иқтисодчи Отабек Бакиров Telegram каналида пост қолдирди.
Ўзбекистонда 1-октябрдан бошлаб юридик шахслар учун бир метр куб табиий газ нархи 660 сўмдан 1500 сўмгача оширилди. Ҳукумат қарори билан автомобилларга газ тўлдириш компрессор шохобчаларида табиий газни сотишда унинг энг баланд чакана нархи келгуси олти ойда бир куб метр учун 3250 сўмдан ошиб кетмаслиги бўйича қатъий чоралар кўрилиши белгиланди. Бу ҳолат 2024 йилнинг 1 апрелигача давом этади.
Энергетика вазирлиги матбуот хизматининг “Дарё”га маълум қилишича, шу пайтгача давлат томонидан газ заправкаларига бир метр куб газ 1500 сўмдан сотилган. Эндиликда бу нарх 1800 сўмга оширилди.
Ҳозиргача заправкаларда сотилаётган 1 куб метр газ нархи 2800 сўм атрофида эди. 1-октябрдан эса бу нарх 3250 сўмгача оширилгани айтилмоқда.
Отабек Бакировнинг ёзишича, республикада Аи-92 бензинининг нархи ҳам кўтарилган.
“Бензин савдоси билан шуғулланадиган АЁҚШларда юқори октанли, яъни 92 ва ундан юқори типдаги бензин ҳам 8-10 фоизга қимматлаган. Норасмий манбалар бу ҳолатни Россиянинг бензин экспортига ўрнатган чекловлари билан боғлашмоқда. “Ўзбекнефтегаз” шохобчаларида ўтган ҳафталаргача 9200 сўмдан сотилган Аи-92 энди 10200 сўмдан сотилмоқда. Сал аввалроқ 16 августгача худди шу маркадаги бензин 8600 сўмдан, март ойидан 2 августгача эса 7500 сўмдан (гўёки акция тариқасида) сотилган. Яъни тўлиқ бўлмаган 2 ойда Аи-92 36 фоизга қимматлади. Бошқача айтганда, Россия ўрнатган экспорт чекловлари баҳонасида юзага келган таклиф камайишидан маҳаллий ишлаб чиқарувчи ва вертикал монополист устомонлик билан фойдаланмоқда. Антимонополия органимиз эса ҳозирча жим-жит. Аи-95 маркали бензиннинг бир доллардан (12200 сўм) арзонроқ таклифи пойтахтдаям, вилоятлардаям қолгани йўқ”, — деб ёзган иқтисодчи.
Аввалроқ Ўзбекистон жорий йилнинг 1-октябридан Россиядан газ импорт қилишга тайёр экани хабар қилинганди. Жорий йил 16 июнда тузилган шартномага мувофиқ, 1-октябрдан Россия Ўзбекистонга газ экспорт қилишни бошлайди. Газ олди-сотдиси бўйича шартнома “UzGazTrade” АЖ ва “Газпром экспорт” МЧЖ ўртасида 2 йил муддатга тузилган.
“Шартнома тўлиқ тижорий шартларда ишлаб чиқилиб, республикамиз истеъмолчиларининг табиий газга бўлган йилдан йилга ошиб бораётган эҳтиёжини қисман қондириш ҳамда куз-қиш мавсумини беталафот ўтказишга қаратилган чора-тадбирлардан биридир. Шартнома доирасида жорий йилнинг 1-октябридан кунига 9 миллион кубометр табиий газни импорт қилиш бошланиши мўлжалланмоқда. Йиллик ҳажм эса қарийб 2 миллиард 800 миллион кубометрни ташкил этади”, — дея хабар берган Ўзбекистон Энергетика вазирлиги.
Аввалроқ “Дарё” мухбирининг мазкур сўровига жавобан Энергетика вазирлиги “Россиядан сотиб олинаётган газ қиш фаслида Ўзбекистон эҳтиёжининг етишмаётган қисмини қоплайди”, дея жавоб қайтарган. Аммо Россия гази неча пулдан сотиб олинаётгани ҳалигача очиқланмаган. Энергетика вазири Жўрабек Мирзамаҳмудов Ўзбекистон Россияга газ учун қанча тўлашини очиқлай олмаслиги, лекин нархни белгилашда миллий манфаатлардан келиб чиқилганини айтган.