Байрам куни ҳар бир инсон оила аъзолари билан вақтини мазмунли ўтказишга, кўнгилочар жойларга боришга ҳаракат қилади. Хўш, бу йил байрамни қандай ўтказишни режа қилдингиз? Агар ҳали режа тузишга улгурмаган бўлсангиз, сизга пойтахтда боришингиз мумкин бўлган байрам тадбирларини тавсия қиламиз.
“Халқлар дўстлиги” санъат саройи концертлардан бир оз тин олган. Боиси, рамазон ойида томошабинлар кечки томошаларга келмайди. Шу боис, байрам куни бориш мумкин бўлган манзиллар рўйхатидан бу саройни чиқариб ташлашингиз мумкин. Фақатгина 24 март куни, соат 14:00 да гала-концерт ўтказилади. Ташкилотчиларга кўра, концертда 10 та хонанда иштирок этади. Чипта нархлари 40-180 минг сўмгача этиб белгиланган.
Тошкент давлат циркига бориш айни муддао. Боиси, цирк жамоаси Наврўз байрамига бағишлаб цирк томошасини саҳналаштирган. Чипта нархлари ҳам у қадар қиммат эмас, 40-50 минг сўм.
Ўзбек миллий академик драма театрида 21 мартдан то 27 мартга қадар очиқ эшиклар куни ўтказилади. “Усмон Носир”, “Тақдир синовлари”, “Садоқат билан” ва “Юлдузли тунлар” каби спектаклларни бепул томоша қилиш мумкин. Фақатгина спектаклдан аввал театр кассасига бориб, бепул чиптани олиш керак. Бир кишига иккита бепул чипта берилади.
Муқимий номидаги Ўзбекистон давлат мусиқали театрида байрам кунлари “Жайдари келин”, “Усмон Носир”, “Қобил ва Ҳобил” ва “Отабек ва Кумушбиби” номи спектакллар қўйилади. Чипта нархлари 30-50 минг сўм этиб белгиланган.
Ўзбекистон давлат ёш томошабинлар театрида байрам кунлари очиқ эшиклар куни муносабати билан бепул спектакллар намойиш этилади. Яъни 21—24 март кунлари соат 12:00 да “Зумрад ва қиммат”, “Золушка”, “Game over” ва “Қизил қалпоқча” спектаклларини болажонларингиз билан бепул томоша қилишингиз мумкин.
Ўзбек миллий қўғирчоқ театрида ҳам байрам кунлари очиқ эшиклар куни ўтказилади. 22—27 март кунлари 11:00 ва 13:00 да “Гусенок”, “Золотой Циплёнок”, “Кто сказал мяу?” каби спектаклларни рус ва ўзбек тилларида томоша қилишингиз мумкин.
Маълум қилинишича, байрам кунлари асосий тантаналар “Янги Ўзбекистон” боғи, “Наврўз” маданият ва истироҳат боғида бўлиб ўтиши режалаштирилган.
Шу билан бирга, туманларда ҳам Наврўз сайллари бўлиб ўтади. Булар:
- Бектемир тумани: Coca-Cola Garden боғи — 19 март куни;
- Учтепа тумани: “Сеул эко боғи” — 19 март куни;
- Шайхонтоҳур тумани: Tashkent City боғи 19—23 март кунлари;
- Юнусобод тумани: “Ўзекспомарказ” ҳудудида 20 март куни;
- Миробод тумани: “Фурқат” маданият ва истироҳат боғи 21—24 март кунлари;
- Мирзо Улуғбек тумани “Марказий истироҳат боғи” 21—24 март кунлари;
- Сергели тумани: “Марказий хиёбон” (мўлжал: Сергели ҳокимлиги) 21 март куни;
- Олмазор тумани: Ёшлик шаҳарчаси, Беруний майдони 19 март куни;
- Яккасарой тумани: Seoul Mun ҳамда Next кўнгилочар масканлари 21—24 март кунлари;
- Янгиҳаёт тумани: Таshkent Index савдо мажмуаси 20 март куни;
- Яшнобод тумани: “Ашхобод сайилгоҳи” 21—24 март кунлари;
- Чилонзор тумани: “Ғафур Ғулом” боғи 21—24 март кунлари.
Изоҳ (0)