Халқаро цирк устаси, актёр Шерзод Мамадалиев “Дарё”га берган интервьюсида Ўзбекистонда цирк усталарига берилаётган маош қониқарли эмаслиги ҳамда ўзидаги истеъдодни қай тарзда пайқагани ҳақида сўзлаб берди.



“Ўзбек циркининг профессионал артистлари ҳозир чет элларда ишламоқда. Чунки улар Ўзбекистондаги маошга қониқмайди. Уларнинг ҳаётини хавф остига қўйиб бажарадиган трюкларига бу ерда берилаётган пул арзимайди. Ўзимнинг бир укам бор. Темур деган бола. У акробат. Бир-бирига қўлини бериб, отиб ўйнашарди саҳнада. Етти йилча аввал у саҳнада йиқилиб тушиб, ҳозирда аравачада ўтирибди. Хитойда эса касал бўлиб ётганимда, агар бу бола отдан йиқилиб, мияси очилиб кетганида, биз ўз пулимиздан буни даволаб, оёққа турғизардик, дейишган. Ўша ерда қозоқ миллатига мансуб цирк устаси саҳнада отдан йиқилиб, мияси жароҳат олганида миясига пластик қўйиб, ҳаётини сақлаб қолишган экан. Ўша бола ҳалигача яшаб юрибди. Хитой тиббиёти ҳам ривожланиб кетган. Бизда ҳам цирк санъатига кўпроқ эътибор беришларини сўрардим.

Цирк артистлари фақат маош билан қотиб қолса, қийналади. Улар бўш пайтларида концерт, тадбирлар ва туғилган кунларга чиқишади”, — дейди Шерзод Мамадалиев.

Шерзод Мамадалиев аёллар овозига пародия қила олиш қобилиятини қай тарзда пайқагани ҳақида гапирди.

“15-20 йилча олдин ўзимда шундай қобилият борлигини пайқаганман. У пайтлар телефон, интернетлар ҳозиргидек ривожланмаган эди. Чойхонада ўтирганимизда бир дўстимга қўнғироқ қилиб, аёлларникидек овоз билан гапирганман. У мени ўртоғимнинг онаси деб қабул қилган. Ўртоқларим кулгидан қотиб қолган. Ундан кейин бу қобилиятимни яна бир дўстимнинг тўйида табрик айтаётганимда ишлатганман. Ҳаммамиз саҳнага чиқиб уйланаётган дўстимизни бирма-бир табриклаяпмиз. Менга навбат келганида овозимни ингичкалаштириб гапирганман. Ўша пайт тўйхонада ўтирган ҳижобли аёллар калима қайтара бошлаган. Кейин табрикни ўзимнинг овозимда тугатганман. Қарабсизки, ўшандан кейин ҳамма Telegram каналларда видеойим тарқалиб кетган. Видеоларимни Instagramъга жойлаганимда негативлар бўлади. Турли ҳақоратомуз изоҳлар ёзишади. Бу бировга шогирд тушиб ўрганилган нарса эмас, шунчаки Аллоҳ томонидан берилган иккинчи овоз. Ушбу қобилиятимдан фойдаланиб, имкон қадар инсонларга позитив улашишга ҳаракат қиламан”, — дейди актёр. 

Шерзод Мамадалиев билан суҳбатни қуйида тўлиқ томоша қилишингиз мумкин.