“Шоҳрух Хоннинг Ҳиндистондаги уйини излаб топдим, аммо уни кўриш насиб қилмади”. Шоҳрух Ҳамдамов Болливуд қиролининг мухлиси экани ҳақида

Актёр Шоҳрух Ҳамдамов “Омон-омон” кўрсатувига берган интервьюсида хонанда бўлолмагани, ҳинд актёри Шоҳрух Хон билан учрашолмагани ва уни ранжитган одамлар ҳақида гапирди.

— Мактабни тамомлаб, эстрада ва цирк коллежининг хонандалик факультетида ўқишга кираман деб борсам “Йўқ, сени бу йўналишда ўқишга ололмаймиз”, дейишди. Кейин билсам хонандалик факультетига фақат санъат мактабини тамомлаб келганларни олишар экан. Шунда устозим “Сен актёрликка топшир, ичида хонандаликни ҳам ўргатишади”, деган. Ўшанда хоҳламай ҳужжатларимни драма факультетига топширгандим. Узоқ вақтгача актёрлик менга эриш туюлган. Чунки машғулотлар давомида устозлар суварак ёки маймун бўлиш вазифасини беришарди, ўқувчилар бажариши керак эди. Бир йилдан кейин бу соҳанинг ичига кириб бордим ва машғулотларни кулиб эмас, жиддий қабул қилишни бошладим.

Аммо менда театрга қизиқиш бўлмаган, бошидан кинони танлаганман. Раҳматли устозимиз Рихсивой Муҳаммаджонов съёмкаларда театр актёрига кўп танбеҳ берарди. Кейинчалик билсам театр актёрларининг хатти-ҳаракатларида бўрттириш бор экан. Бу кадрда яққол сезиларкан. Шундан кейин театрдан қочиш керак деб ўйлаганман. Театрни яхши кўраман, аммо кино алоҳида мактаб. Шу боис театрда ишлаш ниятим умуман йўқ, — дейди актёр Шоҳрух Ҳамдамов.

Актёр 2015 йили Ҳиндистонда режиссёрлик бўйича таҳсил олгани ва ҳинд актёри Шоҳрух Хон билан учрашишга ҳаракат қилгани ҳақида гапирди.

— Ҳиндистонга Шоҳрух Хонни кўриш учун боргандим. Болаликдан унинг фильмларини кўриб катта бўлганман. Ўқишга боришдан асосий мақсад ҳам у билан учрашиш эди. Аммо уйини излаб борганимизда у Дубайга дам олиш учун кетган экан. Уйига борганда кўрдим, мен ёлғиз эмас эканман. Ҳатто, Америкадан ҳам уни кўриш учун мухлислари келган экан, — дейди актёр.

Шоҳрух Ҳамдамов “Уч қаҳрамон” фильмини суратга олишда қандай қийинчиликларга учрагани ва баъзи инсонларнинг негатив фикрлари кўнглига оғир ботгани ҳақида гапирди.

— Бу фильм учун катта куч сарфланди. Йўллар ёпилди, каскадёрлик ишларини ҳам актёрларнинг ўзи бажарди. Авария саҳналарини олиш учун автобуслар ағдарилгани ҳам кўплаб муҳокамаларга сабаб бўлди. Ёз чилласида ёниб фильмни суратга олаётганимизда йўллар ёпилганидан ранжиган одамлар “Шу кинойинг кимга керак”, деб ёнимиздан сўкиниб ўтиб кетди. Лекин шу инсон кино битганидан кейин ўтириб кўради. Ичимда “Агар шу инсон кинони кўрса рози эмасман”, деб қўйдим, — дейди Шоҳрух Ҳамдамов.