Ёш бўлишига қарамай, кўпчиликнинг севимли ижрочисига айланиб улгурган ёш озарбайжонлик қўшиқчи Наҳиде Бабашли турк хонандаси Мурат Гогебаканнинг Ay yüzlüm (“Ой юзлим”) қўшиғини ажойиб тарзда ижро этиб, бир кунда ижтимоий тармоқлар юлдузига айланган эди.
Бабашли YouTube’даги саҳифасига ўз ижроси билан видеороликни жойлаштириши биланоқ қисқа вақт ичида видеони деярли бир ярим миллион киши томоша қилган ва хонандани мақтовларга кўмиб ташлаган. Унинг ижроси турк ОАВ томонидан ҳам юқори баҳоланган.
Болалигидан қўшиқ айтадиган қизалоқ
Наҳиде Бабашли 1996 йил 22 сентябрда Бокуда таваллуд топган. У олий маълумотини Боку давлат университетининг Физика факультетида олган. Ўша пайтда Наҳиде мусиқачи бўлишга қарор қилган. Университетда ўқиб юрган пайтида бир неча марта мусиқа ёзишга ҳаракат қилган, аммо муваффақиятга эриша олмаган. У ўзи ҳақида шундай дейди:
“Мен Боку давлат университетининг Физика факультетини битирганман. Мусиқа билан шуғулланаман, аммо профессионал тарзда эмас. Аммо келажакда уни ривожлантиришни истайман. Эсимни танигандан бери қўшиқ куйлайман, мусиқага қобилиятим бор. Гитара чаламан.
Биринчи курсда менга озар тили ўқитувчиси Анар муаллим овозим жуда чиройли эканини айтди. Кейин мени актёрлик клуби раҳбари Байрам муаллимнинг олдига олиб борди, бу қизнинг истеъдоди бор, уни саҳнага чиқар, ёрдам бер, деди. У мени хорга ёзди, аммо ёрдами бўлмади. Байрам муаллим мақом куйловчиларга кўпроқ аҳамият берарди. Мен эса мақом куйламасдим. Бир ойдан кейин хордан чиқдим. Энди умидим қолмаганди. Бор фикримни дарсларимга қаратаман деб қарор қилдим. У ҳам бўлмади. Мен ўзим истамаган ва қизиқмаган соҳа бўйича таҳсил олардим. Кейин Instagram саҳифасини очиб, у ерда қўшиқ куйлаб, жойлаштирдим. Аввалига юзимни кўрсатмасдим. Аммо бир муддатдан кейин юзим тушиб турган видеоларни суратга олишга, студияда қўшиқ ёзишга киришдим. Шу билан ҳаммаси бошланди”.
Қизғин ижод
Наҳиде Бабашли Поп йўналишида 9 та альбом чиқарган. Ижрочининг альбоми бутун дунёда қарийб 26 000 талаб сотилган. Унинг қўшиқлари мусиқа топ рейтингида 32 ҳафта давомида биринчиликдан тушмаган. Энг кўп машҳурликка олиб чиққан қўшиғи турк ижрочиси Мурат Гогебаканнинг Ay yüzlüm таронаси туфайли бир кун ичида ижтимоий тармоқларнинг юлдузига айланган эди.
Ундан сўнг ҳам куйланган ҳар бир қўшиғи ҳит даражасига чиқишдан тинмасди. Унинг ижросидаги “Соз Вердим” (Сўз бердим), “Беним ҳикаем” (Менинг ҳикоям), “Анласана” (Мени тушун), “Севгилим, тут элимден”( Севгилим, қўлимдан тут) қўшиқлари шулар жумласидандир. У турли жанр ва тилларда куйлай олади, айниқса, хорижий композициялар унга жуда яқин.
Ижодий ютуқлар
2021 йил Наҳиде учун омадли келди, у Туркиянинг нуфузли “Олтин капалак” (Altın Kelebek) мукофотининг соҳиби бўлди. “Олтин капалак” Туркияда телевидение ва мусиқа санъати соҳасидаги энг муҳим мукофотлардан бири ҳисобланади, уни “турк Оскари” деб аташади.
Ҳар йили бу мукофот Туркия ва Озарбайжондан келган энг муваффақиятли ижрочилар, актёрлар ва моделларга берилади. Ғолиблар томошабинлар ва Туркиянинг машҳур шахсларидан иборат ҳакамлар ҳайъати овозлари асосида аниқланади. Ўшанда кўпчилик овозлар Озарбайжондан бўлган ёш хонанда Наҳиде Бабашлига берилди.
Хонанда мусиқа соҳасида илк қадамларини босаётган бўлса-да, унинг ижросидаги қўшиқлар Туркияда, айниқса, машҳур. Бабашли уни қўллаб-қувватлаган барча мухлисларга миннатдорчилик билдириб шундай деганди: “Жудаям асабийлашгандим. Ўз исмим айтилганда кўзёшларимни тўхтатиб қололмадим. Қўшиқ куйлашга киришганимда бу мукофотни олиш менинг орзум эди ва ҳозир у амалга ошди. Бунинг учун оилам ва мухлисларимга раҳмат”, деди Бабашли.
“Олтин капалак”ни 2017 йилда Озарбайжондан биринчи марта халқ артисти Роя Айхан қўлга киритган, иккинчи марта эса 2018 йилда Озарбайжон халқ артисти Айгун Казимовага берилган. Бабашли бу мукофотни олган учинчи озарбайжонлик хонанда бўлди.
Итини машина уриб юборганда Озарбайжондан кўчиб кетмоқчи бўлган
Наҳиде 2022 йилда севимли уй ҳайвони — итини йўқотди, бу унга жуда ёмон таъсир қилди. Бу ҳақда у ўз Instagram саҳифасида ёзиб қолдирган. “Йўл-транспорт ҳодисасида мен севимли Köpük лақабли итимни йўқотдим. Нима ёзсам ҳам, нима десам ҳам мен жуда ғамгинман. У мен учун ҳамма нарса эди”, деб ёзганди у ўз постида. Бабашли бу воқеадан кейин ватанини бир умрга тарк этишни режалаштирганини айтди.
“Ҳодиса Бокуда юз берди — итимни машина уриб, қочиб қолди. Мен ҳали ҳам шокдаман. Чипталар сотиб олдим ва бир неча соатдан кейин мамлакатни тарк этаман. Мен қайтмайман. Маданиятингиз, менталитетингиз, муҳаббатингиз ҳаммаси йўқ бўлсин”, деб ёзганди хонанда.
_1200-a6GUhD7-.avif)
Шуниндек, уй ҳайвонларига меҳрибон Наҳиде 2023 йилда Туркияда юз берган ҳалокатдан кейин қутқарувчилар томонидан қутқарилган уй ҳайвонларини бошпанага олишга тайёрлигини ҳам билдириб шундай деган: “Ҳар куни жабрланганларга ёрдам йиғишда иштирок этяпмиз. Бу даҳшатли фожиа менга жуда катта таъсир қилди. Мен бола асраб олишни жуда хоҳлардим, лекин ҳозирча ўзимни бу қадамга тайёр ҳис қилмаяпман, шунинг учун бир нечта ҳайвонни бошпанага олишга тайёрман ва бу борада тегишли ташкилотларга мурожаат қилдим”, деганди Бабашли.
2 йиллик сирли никоҳ
Санъаткор 2021 йилда Туркия фуқароси Серкан Кучукжейлан билан турмуш қурган. Никоҳ пандемия даврига тўғри келган ва улар яширин ҳолда турмуш қуриб, тўй қилмасдан, фақат никоҳни расмийлаштирган эдилар. Санъаткор турмушини яшириб юрган эди. Ҳатто турмуш ўртоғи Наҳиде билан фотосуратларини тарқатган бўлса-да, қўшиқчи ҳеч қандай маълумот бермаган эди. Суратларда ёшлар жуда бахтли кўринишарди аммо никоҳ орадан 2 йил ўтиб бекор қилинди.
Наҳиде ва Серкан 2023 йилда 2 йил давом этган никоҳни 10 дақиқа давом этган судда бекор қилишган, Наҳиде Кучукжейландан ҳеч қандай товон пули талаб қилмаган.
Наҳиде Ўзбекистонга, байрам дастурларига ва концертларга тез-тез таклиф этилади. Жумладан, 2020 йилда Зоҳиршоҳ Жўраевнинг концертига ташриф буюриб, у билан бирга “Лейли де ёр” таронасини ижро этган. Зоҳиршоҳ Жўраев Наҳиде билан бир неча йиллик дўст эканлигини интервьюларида айтиб ўтган.
Мухлислар ушбу дуэтни жуда илиқ кутиб олишган. Шунингдек, Наҳиденинг ижтимоий тармоқлардаги суратларида уни Самарқандга ҳам бориб туришини кўриш мумкин.
Изоҳ (0)