Футбол бўйича Жаҳон чемпионати 3-саралаш босқичи доирасидаги Ўзбекистон — Қирғизистон учрашуви 20 март, пайшанба куни Тошкентдаги “Бунёдкор” стадионида бўлиб ўтади. Унда жамоа ҳимоячиси Умарбек Эшмуродов дисквалификация сабаб ўйинни ўтказиб юборади.
Футболчи жамоанинг 6-турдаги Шимолий Кореяга қарши ўйинда қизил карточка олган эди. У учрашувнинг 83-дақиқасида рақиб ҳужумчисига қўпол ҳаракат қилгани учун майдондан четлатилган.
Аввалроқ Ҳусниддин Алиқулов ҳам Туркия чемпионатидаги “Ризеспор” — “Бодрум” учрашувида жароҳат олиб, терма жамоанинг мартдаги йиғинини ўтказиб юбориши аниқ бўлган эди.
Шунингдек, ўйин олдидан ўтказилган матбуот анжуманида Темур Кападзе Остон Ўрунов ўзини ёмон ҳис қилгани учун унинг ўрнига Ҳожимат Эркинов таркибга жалб этилгани ҳақида айтди.
Ўзбекистон терма жамоаси 6-турдан кейин А гуруҳида 13 очко билан 2-ўринни эгаллаб турибди. Қирғизистон 3 очко билан 5-ўринни банд этган.
Эслатиб ўтамиз, Ўзбекистон — Қирғизистон баҳси бугун, 20 март куни 21:00 да бошланади.
Изоҳ (0)