Марказий Осиё давлатлари 2023 йилда мудофаа учун 1,8 миллиард доллар ажратди. Бу 2022 йилга нисбатан 5,3 фоизга кам. Бу ҳақда Стокгольм халқаро тинчлик тадқиқот институти (SIPRI) ўз ҳисоботида маълумот берди.
Маълумотлар йўқлиги сабабли Ўзбекистон ва Туркманистон ҳисоб-китобларга киритилмаган. Тўққиз йил ичида Марказий Осиё давлатлари мудофаа харажатларини 16 фоизга қисқартирган. Ўтган йили дунё бўйлаб ҳарбий харажатлар учун рекорд даражадаги 2,44 триллион доллар маблағ сарфланди.
АҚШ, Хитой, Россия, Ҳиндистон, Саудия Арабистони, Буюк Британия, Германия, Украина, Франция ва Япония 2023 йилда ҳарбий бюджетга энг кўп маблағ сарфлаган ўнталик мамлакатларидан ҳисобланади.
АҚШнинг ҳарбий соҳага ажратган маблағи 2,3 фоизга ўсиб, 2023 йилда жами 916 миллиард долларни ташкил этди. 296 миллиард долларлик ҳарбий бюджет билан Хитой 6 фоизлик ўсишни қайд этган. Россияда эса бу 24 фоизга ошиб, 109 миллиард долларлик чегарага етган.
Изоҳ (0)