“Ўзбекистон Республикасининг Евросиё тараққиёт банкини таъсис этиш ҳақидаги битимга (Остона, 2006 йил 12 январь) қўшилиши тўғрисида”ги қонун Сенатда маъқулланди.
Битимнинг асосий мақсади инвестиция фаолияти орқали унга қўшилган иштирокчи давлатларнинг иқтисодий ўсишига ва улар ўртасидаги савдо-иқтисодий алоқаларни кенгайтиришга кўмаклашишдир.
Мазкур ҳужжатга кўра, ушбу банк ўз фаолиятини халқаро шартномалар, халқаро ҳуқуқ, умумэътироф этилган банк фаолияти тамойиллари ва меъёрларига мувофиқ амалга ошириши, шунингдек, банк низоми ушбу битимга илова қилинган ҳолда тасдиқланиши назарда тутилган.
Шунингдек, банк низомида Евросиё тараққиёт банки фаолияти, мақсад ва вазифалари, функциялари, имтиёзлари, устав капитали ва унга обуна бўлиш шартлари ҳамда банк бошқарувига оид тартиб-қоидалар белгиланган.
Бундан ташқари, Евросиё тараққиёт банки иштирокчи давлатларнинг иқтисодиёти ва молиявий бозорлари ҳолати, уларнинг инвестиция имкониятлари, пул-кредит ва валюта муносабатлари, банк ва валютани тартибга солиш соҳасидаги қонунчилик нормалари тўғрисидаги маълумотларни тўплаши, тизимлаштириши ва таҳлил қилиши белгиланмоқда.
Сенаторларнинг қайд этишича, қонуннинг қабул қилиниши Ўзбекистоннинг Евросиё тараққиёт банкига аъзо бўлиши учун ҳуқуқий асос яратишга, унинг фаолияти доирасида тўлиқ ва самарали иштирок этиш ҳуқуқини таъминлашга, шунингдек, банкка аъзо давлатларнинг иқтисодий ўсишига кўмаклашишга, савдо-иқтисодий алоқаларини кенгайтириш ва инвестиция фаолияти орқали Евросиё ҳудудида интеграция жараёнларини ривожлантиришга хизмат қилади.
Евросиё тараққиёт банки (Eurasian Development Bank, EDB) халқаро молия ташкилоти бўлиб, Евросиё минтақаси мамлакатларида иқтисодиётни, савдо-иқтисодий муносабатларни ва интеграция жараёнларини ривожлантиришга қаратилган инвестиция фаолиятини амалга оширади. У 2006 йилда Россия ва Қозоғистон томонидан ташкил этилган бўлиб, 2009 йилда Арманистон ва Тожикистон, 2010 йилда Беларусь, 2011 йилда Қирғизистон ушбу банкка аъзо бўлган.
Ўзбекистон Евросиё тараққиёт банкига 2025 йилда аъзо бўлишни режалаштирмоқда. Айни пайтда мамлакат ушбу банкка кузатувчи мақомида бўлиб, аъзо бўлишга 2022 йилдан буён тайёрланмоқда.
Изоҳ (0)