Қирғизистон президенти Садир Жапаров Марказий Осиё мамлакатларига ўзаро визасиз режим, бошқа давлатлардан келган меҳмонлар учун эса ягона виза жорий этишни таклиф этди. Бу ҳақда у ижтимоий тармоқда Тожикистон билан имзоланган давлат чегараси тўғрисидаги шартномага изоҳ чекиш давомида шундай фикр билдирган.
“Бугун Қирғизистон ва Тожикистон ўртасидаги 101 йил давомида (1924 йилдан бери) ҳал этилмаган чегара масаласи узил-кесил ечимини топди.
Бу нафақат икки мамлакат, балки бутун Марказий Осиё минтақаси учун улкан воқеа, чунки энди минтақанинг барча давлатлари ўзаро чегара масалаларини тўлиқ ҳал қилди, дейиш мумкин. Шу пайтдан бошлаб Марказий Осиёда абадий тинчлик қарор топди.
Энди Марказий Осиё мамлакатлари ўзаро визасиз режим жорий этиш, бошқа давлатлардан келган меҳмонлар учун эса Шенген визасига ўхшаш, минтақанинг барча мамлакатларида эркин ҳаракатланиш имконини берувчи ягона виза тизимини йўлга қўйиш жараёнини бошлашлари лозим”, дейди Жапаров.
13 март куни Қирғизистон президенти Садир Жапаров ва Тожикистон президенти Эмомали Раҳмон икки мамлакат ўртасидаги Давлат чегараси тўғрисидаги битимни имзолади.
Қирғизистон—Тожикистон чегарасининг умумий узунлиги 1 минг 6,84 километрни ташкил этади, шундан 519,9 километри 2011 йилгача, 486,94 километри эса сўнгги уч йил ичида аниқланган. Ўнлаб баҳсли участкалар туфайли у ерда вақти-вақти билан қуролли тўқнашувлар юз бериб турарди.
Изоҳ (0)