Ўзбекистоннинг Малайзиядаги элчиси Каромиддин Гадоев Pro Events and Marketing Sdn Bhd компаниясининг бошқарув директори Элайне Тхам билан учрашув ўтказди. Бу ҳақда “Дунё” АА хабар берди.
Унда Ўзбекистонда Малайзиянинг мазкур компанияси иштирокида инвестиция лойиҳаларини амалга ошириш истиқболлари муҳокама қилинди.
Малайзия томони Ўзбекистонда электр скутерлар (3 ва 4 ғилдиракли ихчам электромобиль) ишлаб чиқариш лойиҳасини амалга ошириш имкониятларини кўриб чиқаётганини маълум қилди.
Элайне Тхамнинг айтишича, дастлабки ҳисоб-китоблар асосида йиллик ишлаб чиқариш миқдори 5 мингта скутерни ташкил этиши кўзда тутилмоқда.
“Кейинчалик Марказий Осиё мамлакатларига экспорт қилиш салоҳиятларини инобатга олган ҳолда, уни 10 мингтага етказиш имконияти мавжуд. Скутерлар ишлаб чиқаришни маҳаллийлаштириш Ўзбекистонда аҳолига етказиб бериш хизматининг сифатини янада оширишга хизмат қилиши мумкин”, дейди компания бошқарув директори.
Шунингдек, хориж томони Ўзбекистонда соғлиқни сақлаш соҳасида сунъий интеллект ёрдамида инсонларда тиббий диагностика ўтказиш дастурий таъминотини жорий қилиш бўйича ҳамкорликка тайёрлигини билдирди.
Учрашув якунида белгиланган лойиҳаларни амалга ошириш истиқболларини ўрганиш учун компания раҳбариятининг Ўзбекистонга бизнес-миссияни ташкил этишга келишиб олинди.
Изоҳ (0)