Қирғизистондаги Ўзбекистон билан ҳамкорликда ишга туширилган автомобиль заводида Matiz ва Nexia каби моделлар ишлаб чиқарилмайди. Бу ҳақда Қирғизистон Иқтисодиёт вазирлиги саноат бошқармаси бош мутахассиси Элдос Сагимбаевга таяниб, “Tazabek.kg” хабар берди.
![](/static/2024/08/21/photo_2024-08-21_15-33-20-SHYdMrYd.jpg)
Сагимбаевнинг сўзларига кўра, заводда ишлаб чиқариладиган энг арзон автомобиль тахминан 11,5-12 минг долларлик Chevrolet Cobalt’дир. Ундан кейинги ўринда Chevrolet Onix (15-16 минг доллар) ва Tracker (жиҳозланишига қараб 18-22 минг доллар) турибди.
“Завод фаолиятининг биринчи босқичида биз 10 мингта автомобиль ишлаб чиқаришни ва 100 та иш ўрни яратишни режалаштирмоқдамиз. Ушбу босқичда биз Chevrolet автомобилларининг қуйидаги моделларини ишлаб чиқаришни режалаштирганмиз: Cobalt, Onix, Malibu ва Tracker”, деди у.
Шунингдек, мутахассис тез орада Isuzu енгил автомобиллари, йўлтанламас, пикап ва автобуслар ишлаб чиқарилишини айтди.
18 июль куни Қирғизистон президенти Садир Жапаров ва Ўзбекистон президенти Шавкат Мирзиёев Тulpar Motors автомобиль заводи фаолиятига старт берди. Чуй вилоятининг Оқсув қишлоғидаги завод майдони 47 минг квадрат метрни ташкил этади ва General Motors ишлаб чиқариш технологиясидан фойдаланади.
Изоҳ (0)