Ўзбекистон, Қирғизистон, Тожикистон давлат чегаралари туташган нуқтада 8 январь куни уч мамлакат ҳукуматлари раҳбарлари бошчилигидаги делегациянинг учрашуви бўлиб ўтди.
Ўзбекистон ҳукумати матбуот хизмати хабарида қайд этилишича, мазкур учрашув уч давлат чегараси туташган ҳудудда ўтказилгани рамзий маънога эга. Боиси давлатлар раҳбарларининг кучли сиёсий иродалари ва конструктив муносабатларга асосланган сиёсатлари туфайли минтақада дўстлик ҳамда яхши қўшничилик, кўп қиррали алоқалар мустаҳкамланиб, янги поғонага кўтарилди. Айни пайтда, Марказий Осиё тинчлик ва фаровонлик ҳудуди экани амалда ўз ифодасини топмоқда.
Томонлар ушбу учрашув уч мамлакат давлат раҳбарлари — Шавкат Мирзиёев, Садир Жапаров ва Эмомали Раҳмон ўртасида ҳамкорлик ва минтақавий интеграцияни мустаҳкамлаш мақсадида давлат чегараси масалалари бўйича аввал эришилган келишувлар доирасида ўтказилаётганини таъкидлади.
“Уч мамлакат бош вазирлари савдо, логистика, сув-энергетика ва маданий-гуманитар алоқалар каби муҳим йўналишларда ўзаро ҳамкорликни мустаҳкамлаш учун катта имкониятларга эга эканини таъкидлашди. Уларнинг фикрича, трансчегаравий ва минтақалараро ҳамкорликни ривожлантириш ҳамкорликнинг муҳим таркибий қисми бўлиб, бу мамлакатлар ўртасидаги ўзаро ҳамкорликни фаоллаштириш учун воситага айланади”, дейилади Қирғизистон ҳукумати матбуот хизмати хабарида.
Маълум қилинишича, учрашувда Қирғизистон ва Ўзбекистон ўртасидаги давлат чегарасини делимитация қилиш ва “Қирғизистон—Ўзбекистон давлат чегараси тўғрисида”ги шартномага ратификация ёрлиқлари алмашиш жараёни якунлангани айтилди. Қирғизистон ва Тожикистон ўртасидаги 2024 йил 4 декабрдаги давлат чегараси тўғрисидаги битимда Қирғизистон—Тожикистон давлат чегарасининг қолган участкаларини тавсифлаш жараёнини якунлашнинг алоҳида аҳамияти қайд этилган.
Учрашувда якунида ҳукумат раҳбарлари бугунги учрашув халқлар ва мамлакатлар фаровонлиги манфаатларидан келиб чиққан ҳолда минтақанинг ўнлаб йиллардаги тақдирини белгилаб беришига ишонч билдирди.
“Келгусида бўлиб ўтадиган давлат раҳбарларининг учрашуви қардош мамлакатлар ўртасидаги яхши қўшничилик ва кўп қиррали шериклик муносабатларини ривожлантиришга хизмат қилади”, дейилади хабарда.
Ушбу учрашув уч давлат — Қирғизистоннинг Боткен вилояти, Ўзбекистоннинг Фарғона вилояти ва Тожикистоннинг Сўғд вилояти давлат чегаралари туташган ҳудудда бўлиб ўтди.
Изоҳ (0)