Қирғизистон Вазирлар Маҳкамаси мамлакатдан кўмир экспортини вақтинча тақиқлаш тўғрисида қарор қабул қилди. Бу ҳақда “Кабар” ахборот агентлиги хабар бермоқда.
Тегишли қарор 21 ноябрь куни Вазирлар Маҳкамаси раиси Оқилбек Жапаров томонидан имзоланган.
Ҳужжатда кўрсатилишича, Қирғизистондан кўмирни автомобиль транспортида Евросиё иқтисодий иттифоқи божхона ҳудудидан ташқарига олиб чиқиш тақиқланган. Бироқ “Иркештам автойўл” ва “Торуғарт автойўл” автомобиль ўтиш пунктлари бундан мустасно. Чеклов “Қирғизкўмир” давлат корхонасининг ушбу ўтиш пунктлари орқали автомобиль транспортида кўмир экспорт қилишига нисбатан қўлланилмайди.
Чеклов Евросиё иқтисодий иттифоқи давлатларининг ташқи иқтисодий фаолияти товар номенклатурасининг 2701 ва 2702 кодлари билан таснифланадиган кўмирга нисбатан қўлланилади. Тақиқ олти ой муддатга жорий этилган.
Қирғизистон Иқтисодиёт ва савдо вазирлиги мазкур қарор кучга кирган кундан бошлаб уч кундан кечиктирмай, белгиланган тартибда Жаҳон савдо ташкилоти ва Евросиё иқтисодий комиссиясини бу ҳақда хабардор қилади.
Қирғизистон Ташқи ишлар вазирлиги эса МДҲ Ижроия қўмитасини қарор ҳақида хабардор қилиши керак.
Қарор расмий эълон қилинганидан сўнг 15 кун ўтгач кучга кириши белгиланган.
Аввалроқ Қирғизистон Ўзбекистонга экспорт қилинадиган кўмир нархини 37 фоизга оширганди. Фарғонада Қирғизистондан йиллик 6 млн тонна қирғиз кўмири етказиб бериш лойиҳаси амалга оширилиши ҳақида хабар берилганди.
Изоҳ (0)