Rossiya FVV rahbari yordamchisi Yuriy Mezinov Kursk viloyatining Suja va unga yaqin qishloqlarida bedarak yo‘qolganlar ro‘yxatida bo‘lgan 100 dan ortiq kishi topilganini ma’lum qildi. Mintaqaga hujum boshlanganidan beri Rossiya Qizil xoch tashkiloti (RKK) bedarak yo‘qolganlar haqida 7 mingdan ortiq murojaatni qabul qilgan. Bu haqda “Kommersant” xabar berdi.
12-mart kuni Rossiya Mudofaa vazirligi Rossiya armiyasi Kursk viloyatidagi beshta aholi punktini egallab olganini ma’lum qilgan. Kursk viloyati gubernatori vazifasini bajaruvchi Aleksandr Xinshteynning so‘zlariga ko‘ra, rossiyalik harbiylar va ko‘ngillilar Suja hududidan 68 kishini evakuatsiya qilgan.
Muhimi, biz topgan odamlarning 90 foizi, ya’ni hozirgi paytda 100 dan ortiq kishi — aniq raqamni aytolmayman, lekin 90 foizi bizning bedarak yo‘qolganlar ro‘yxatimizda bor. Bu oilalar hozir o‘z yaqinlarini topadi. Tasavvur qilyapsizmi, bularning barchasi yarim yildan ortiq vaqt davomida hech narsa bilmagan, ko‘rmagan, o‘z oilasidan uzoqda yashashga majbur bo‘lgan, dedi Mezinov.
9-yanvar kuni Rossiyadagi inson huquqlari bo‘yicha vakil Tatyana Moskalkova Kursk viloyatining qidiruvdagi aholisi haqidagi ma’lumotlarni o‘z ichiga olgan hujjatni e’lon qildi. Fevral oyi oxirida Kursk viloyati hukumati veb-saytida viloyatning bedarak yo‘qolgan aholisi to‘g‘risidagi ma’lumotlar reyestri paydo bo‘ldi. Xinshteynning ta’kidlashicha, tizimga 1,9 mingdan ko‘proq bedarak yo‘qolgan shaxslar kiritilgan.
Suja shahri 2024-yil avgustidan beri Ukraina qurolli kuchlari nazorati ostida edi. 12-mart kuni ijtimoiy tarmoqlarda rossiyalik harbiylarning shahar markaziy maydonida bemalol harakatlanayotgani aks etgan videolar tarqaldi. Sujaning ozod etilgani haqida hali rasmiy xabar berilmagan.
Izoh (0)