“Украина Курск вилоятидаги 92 та аҳоли пунктини назорат қилмоқда” — Зеленский

Украина қуролли кучлари Россиянинг Курск вилоятидаги 92 та аҳоли пунктини назорат қилмоқда. Бу ҳақда президент Владимир Зеленский хабар берди.

“Украиналик жангчилар Курск вилоятининг айрим ҳудудларида ҳимоя операциясини давом эттирмоқда. Бугунги кунда бизнинг кучларимиз 1250 квадрат километрдан ортиқ душман ҳудуди ва 92 та аҳоли пунктини назорат қилмоқда”, деди Украина президенти.

Зеленский ҳозирда Украина армияси позицияларини мустаҳкамлаб, келажакда украиналикларга айирбошлаш режалаштирилган россиялик асирлар сонини кўпайтираётганини айтди. Сиёсатчига кўра, бир неча ой олдин дунёда кўпчилик Курск ҳужумини “нореал” ва “Россиядаги барча қизил чизиқларнинг энг қизил кесишмаси” деб ҳисоблаган бўларди.

“Айнан шу учун бизнинг бундай тайёргарлигимиз ҳақида ҳеч ким эшитмаган. Бир қатор шериклар томонидан урушни баҳолашда устунлик қилган Россияга нисбатан қизил чизиқлар деб аталадиган содда, хаёлий концепция яқинда Суджа шаҳри яқинида барбод бўлди”, деди Зеленский ва “фаол, превентив ҳимоя Россия террорига қарши энг самарали кураш” эканини айтди.

Унинг таъкидлашича, агар Украина шериклари Россия ҳудудида қурол ишлатиш бўйича барча чекловларни олиб ташласа, Киев Курск вилоятига ҳужум қилмасди. Украина раҳбари Россиянинг ҳарбий базалари, аэродромлари, логистика ва бошқа ҳарбий объектлари армия учун “тўлиқ адолатли нишонлар” эканини билдирди.

“Бизга Ғарб томонидан етказиб берилаётган қуролларни ишлатишда етарлича узоқ масофага зарба бериш керак”, дея хулоса қилди у.