Ўзбекистон ҳудуди бўйича ўтган қиш мавсумининг ҳарорат тартиби ўртача кўп йиллик қийматларга мос бўлди. Бу ҳақда “Ўзгидромет” хабар берди.
Маълум қилинишича, ўтган қишнинг энг совуқ ойи декабрь ойи бўлиб, бунда меъёрдан 1-2,5 даражага совуқроқ, республика шимолида ва чўл ҳудудларида меъёр атрофида бўлди.
Ушбу йилда январь ойи қиш мавсумининг энг совуқ ойи деган номга мос келмади, деярли республиканинг барча ҳудудлари бўйича январь ойи декабрь ойига нисбатан илиқроқ бўлди. Январь ойида ўртача ойлик ҳаво ҳарорати ўртача кўп йиллик қийматлардан 0,5-1 даражага, шимолда 2-3 даражага юқори бўлди.
Февраль ойининг ҳарорат тартиби иқлим меъёрига яқин бўлди. Фақат Фарғона водийси ҳудудларида февраль ойининг ўртача ҳарорати ўртача кўп йиллик қийматлардан 1,5-2 даражага юқори бўлди.
2024-2025 йиллардаги қиш мавсуми давомида илиқ тўлқинлар ва совуқ тўлқинлар бир-бири билан ўрин алмашиниши кузатилди –— кўпинча Ўзбекистонда шундай қиш мавсумлари қайд этилади.
Республика ҳудудининг катта қисмида энг кучли совуқлар декабрь ойида, шимолда эса февраль ойида ҳам кузатилди. Совуқ энг кучли бўлган кунларда ҳаво ҳарорати 8-13 даража совуққача, Қорақалпоғистон Республикасида ва Навоий вилоятининг шимолида 15-18 даража совуққача, жанубда 3-8 даража совуққача пасайди.
Қиш мавсуми ойларида кузатилган илиқ даврларда кундуз кунлари ҳаво ҳарорати 12-17 даража илиққача, февраль ойи учинчи ўн кунлигининг бошида эса 18-21 даража илиққача, жанубда 23-24 даража илиққача кўтарилди. Бундай ҳарорат қийматлари Ўзбекистонда деярли ҳар қиш мавсумида кузатилади.
Ўтган қишнинг ўзига хос хусусияти, бу қиш фаслининг уч ойида ҳам ёғингарчилик тақчиллиги кузатилганлигидир. Ўзбекистон ҳудудининг катта қисмида қиш даврида ёғингарчилик миқдори меъёрдан 40-70 фоизни ташкил этди, Фарғона водийси вилоятларида меъёрдан 40 фоиз кам бўлди. Фақат ёғингарчилик меъёри жуда кам бўлган энг қурғоқчил ҳудудларда мавсумий ёғингарчилик миқдори меъёрга яқин бўлди.
Ўтган қиш мавсумида ёғингарчилик асосан ёмғир кўринишида қайд этилди, айрим кунларда қорга айланиши кузатилди. Қиш ойларида ёғингарчилик тақчиллиги Ўзбекистоннинг тоғли ҳудудларида қор тўпланишига таъсир қилди.
Қиш охирига келиб, тоғлардаги қор қопламининг баландлиги меъёрдан фақат 40-60 фоизни ташкил этди. Ўтган қишнинг ҳарорат тартиби ўртача кўп йиллик қийматларга яқин бўлишига қарамай, қиш фаслларининг исиши бўйича узоқ муддатли тенденция давом этмоқда.
Изоҳ (0)