Тошкент шаҳар ҳокимининг “Тошкент шаҳрида иқтисодиёт тармоқлари, ижтимоий ва энергетика соҳа объектлари ҳамда кўп квартирали уй-жой фондини 2025/2026 йиллар куз-қиш даврида барқарор ишлашга тайёрлаш чора-тадбирлари тўғрисида”ги қарори қабул қилинди.
Қарорга кўра, 2025 йил охиригача эксплуатация муддати ўтган 452 та лифт янгисига алмаштирилади.
Бугунги кунда Тошкент шаҳридаги кўп хонадонли уй-жойларда жами 9101 та лифт мавжуд. Улардан 2042 тасининг (22,4 фоиз) фойдаланиш муддати ўтган.
Қайд этилишича, 2025 йил охиригача 2042 та эски лифтнинг 22,1 фоизи янгиланади. Янги лифтлар илғор хавфсизлик стандартларига эга ва энергия тежамкор бўлади.
Янгиланадиган лифтларни танлаш мезонлари қуйидагича:
- 25 йилдан ортиқ хизмат қилган;
- техник талабларга жавоб бермайдиган;
- хавфсизлик даражаси паст бўлган лифтлар устувор тартибда алмаштирилади.
Аввалроқ кўп квартирали уйларнинг лифтларини бошқариш ва мониторинг қилиш бўйича “Хавфсиз лифт” ягона идоралараро платформаси ишлаб чиқилаётгани ҳақида хабар берилганди.
Бугунга қадар кўп қаватли уйлардаги 8 942 та лифт техник кўрикдан ўтказилиб, улар бўйича паспорт ва мувофиқлик сертификати жорий этилади. Шу асосда келгуси 5 йилда 2 001 та лифт янгиланади ва 382 таси таъмирланади.
Изоҳ (0)