Янги йил арафасида дунёнинг аксарият пойтахтлари мўжизавий қиёфага киради. Байрам кайфияти яратилади, ёрқин гулчамбарлар илинади, марказий майдонларда бир кечада чиройли арчалар пайдо бўлади.
Лондон
Одатда Буюк Британия пойтахтини безаш ишлари октябрь ойиданоқ бошланади. Бу байрам кайфиятини олдиндан яратиш, шаҳар аҳолисини Янги йил мўжизаси муҳитига сингдириш учун қилинади. Чунки инглизлар учун Янги йил энг севимли ва эъзозланадиган байрамдир.
Аввало дўконларнинг витриналарида ўзгариш содир бўлади — тоза ювилиб ярқираб турган ойналар ортида гўё бир кечада сеҳрли тарзда буғуларнинг ёрқин шакллари, кичик арчалар, энг ғаройиб шаклдаги занжабил пряниклари пайдо бўлади.
Нью Йорк
Ҳайратланарлиси шундаки, Нью Йоркда байрам кайфиятини яратишни бошқалардан кўра яхшироқ уддалайдилар. Янги йил арчаси чироқларини ёқиш маросими катта байрамга айланади.
“Рокфеллер маркази”да 30 минг чироқли гулчамбарлар билан безатилган улкан арча безатилади. Бу арча 1931 йилдан бери ҳар қиш мавсумида су ерда безатилади.
Айнан Нью Йоркда юзлаб Қорбоболарни, табассум қилаётган буғуларни ва у ёки бу дўкон витринасининг ялтироқ ойнаси ортидан самимий қўл силтаётган элфларни учратиш мумкин. Марказий майдонларнинг бирида улкан қизил арча ўйинчоқлари пайдо бўлади.
Париж
Парижда Янги йил яқинлашаётганини Pringtemps ва Galeries Lafaette бош дўконларининг витриналаридан билиб олиш мумкин — бу икки дўкон гўё бир-бири билан рақобатлашаётгандек.
Бир неча йил муқаддам савдо марказларининг деразалари ортида митти ҳайвонлар пайдо бўлган — сичқонлар вертолётларда учишар, мўйнали қуёнлар эса канкан рақсини ижро этишарди.
Бу йил Париждаги Янги йил ранглари орасида оқ ранг устунлик қилади. Масалан, Dior витринаси катта кумушранг арча билан безатилган бўлиб, у гўё элита бутик жойлашган қадимий уй деворлари билан қўшилиб кетгандек кўринади.
Афсуски, Франция пойтахтида қор камдан кам ҳолларда ёғади. Ҳар сафар қор ёғганда французлар учун ҳақиқий байрам бўлади.
Майдонларда Янги йил ярмаркалари иш бошлайди, дарахтлар ялтироқлар билан безатилади. Елисей майдонида одамлар орасида тиним йўқ — байрамолди ташвишлар ҳар бир кишини шошишга, югуришга, пештахталардаги буюмларни харид қилишга мажбур қилади, кўча эса минглаб чироқлар билан порлайди.
Берлин
Қишки байрамлар арафасида немисларнинг фавқулодда жиддийлигидан асар ҳам қолмайди. Минглаб чироқлар ёғилиб турган арчалар, қанотли отлар ва аттракционлар ҳар қандай хўмрайган катта одамни беташвиш болаликка олиб кетади.
Замонавий санъат услубидаги безаклар ҳам тез-тез учрайди: оқшом қоронғисида тўкилган конусларга ўхшаб кетадиган арчалар, катта ўлчамдаги цилиндрлар, улар орасида ҳақиқий (ёки сунъий) Янги йил арчалари байрам кайфиятини яратади.
Москва
Бутун дунё Янги йил байрамига тайёргарлик кўраётган бир пайтда Россияда ҳам байрам шукуҳи кезиб юради. Кузнинг ўзидаёқ дарахтларда дастлабки ялтироқлар пайдо бўла бошлайди, лекин кутилмаганда байрамдан бир неча ҳафта олдин тўсатдан бежирим, майда-чуйдаларгача эътибор берилган ансамбл пайдо бўлади.
Тверская ҳамиша юлдузли осмон остида мисли кўрилмаган порлоқ йўлакка айланади — минглаб лампочкалар уйдан уйга уланиб кетади.
Прага
Нафақат қишда, балки йилнинг бошқа ҳар қандай фаслида ҳам Прага афсонавий шаҳар бўлиб қолади. Сариқ деразали шинамгина мўжазгина уйчалар қад кўтариб туради, Старомест майдонида грог ва глинтвейн сотилади, оқшом қоронғисида милтиллаб турган фаришталар мўжиза бошланишига яқин қолгани, озгина сабр қилиш кераклигини таъкидлаётгандек гўё.
Мусиқачилар ва кўча артистлари импровизация қилинган саҳналари билан томошабинларни хурсанд қилиш учун Қорли кўприк олдида тўпланишади. Агар болалигингиздаги эртакни эшитишни истасангиз — Прагага боринг, мўжизалар бу ерда ҳар йили содир бўлади.
Рим
Римда совуқ бўлмайди. Декабрь кунларида боқий шаҳар боғларида атиргуллар ва апелсин дарахтлари гуллайди. Кундузи ҳаво ҳарорати +15 даража атрофида бўлади, кечалари +7 даражагача пасаяди. Янги йил куни яшил майсазорларда енгил кийим кийган, шампан ичиб ўтирган ёшларни учратиш мумкин.
Италянлар байрамларни яхши кўришади. Минглаб чироқлар ва мазали таомлар қанчалик кўп бўлса, келаётган йил шунчалик бахтли бўлади.
Изоҳ (0)