Совуқ ҳаво кириб келиши билан Афғонистонда улоқ мусобақаси бошланади. “Дарё” мухбири Мозори Шариф шаҳрида бўлиб ўтган тўёлди улоқ мусобақасига ташриф буюрди.
Улоқ Афғонистондаги анъанавий ва жамоавий спорт тури ҳисобланиб, у мамлакат шимолидаги ўзбек ва туркман халқлари орасида кенг тарқалган. У асосан куз, қиш ва баҳорда мамлакатнинг шимолий ва шимоли-шарқидаги ҳудудларда одатда жума кунлари ўтказилади.
Мусобақа томошабинларидан бири афғонистонлик иқтисодий аҳволи яхши бўлган ўзбеклар ва туркманлар тўй маросимларида улоқ мусобақасини ўтказишини айтди.
Балх вилоятининг Шулгара туманида яшовчи Нодирбек “Дарё” мухбири билан суҳбатда укасининг тўйига ҳозирлик кўраётганини маълум қилди. Унинг сўзларига кўра, тўй маросимларида дўстлар, қариндош-уруғлар, шунингдек, улоқ мусобақаси учун эса оти бўлган ҳар бир киши узоқ қишлоқлардан ҳам тўй маросимига таклиф қилинади.
“Улоқ биз ўзбекларнинг урф-одати ва маданиятидир. Бундай маросимларни ўтказиш орқали маданиятимизни сақлаб қолишимиз керак”, дейди Нодирбек.
- Улоқ спорти 1994 йилда Афғонистоннинг расмий миллий спорт тури сифатида тан олинган.
Ушбу анъанавий ва узоқ тарихга эга спорт тури афғон маданиятининг бир қисми ҳамдир. Афғонистонда мазкур мусобақа одатда байрамларда, тўйларда ва миллий байрамларда ўтказилади.
Изоҳ (0)