Нурмат Отабеков Ўзбекистонда ўткир респиратор вирусли инфекциялар авж олгани ҳақида тарқалган хабарлар ҳақиқатга зидлигини маълум қилди.
Ижтимоий тармоқларда мамлакат бўйлаб ўткир респиратор вирусли инфекциялар авж олгани, айниқса, мактаб ва боғчаларда касаллик кенг тарқалгани, оқибатда поликлиникалар эмланмаган бемор болалар билан тўлгани ҳақида хабарлар тарқалганди.
“Аввало, шуни айтиш керакки, ижтимоий тармоқларда тарқалаётган бу хабарлар ҳақиқатга зид. Боиси айни пайтда юртимизда мавсумий респиратор касалликлар тарқалиши билан боғлиқ вазият барқарор ва хавотирланишга ҳеч қандай асос йўқ”, дейди Санитария-эпидемиологик осойишталик ва жамоат саломатлиги қўмитаси раисининг биринчи ўринбосари.
Унинг қайд этишича, ҳаво-томчи йўли орқали юқадиган ўткир респиратор вирусли инфекциялар мавсумий характерга эга бўлиб, уларнинг кўтарилиш даври куз-қиш ва қиш-баҳор ойларига тўғри келади.
“Бундан эса зинҳор хавотирга тушиш керак эмас”, дейди мутахассис.
Бир неча кун аввал мамлакатда қиш мавсумига хос бўлмаган илиқ об-ҳаво кузатилди. Кеча эса аксинча, ҳудудларда қор ёғиб ўтди. Нурмат Отабековнинг айтишича, ҳавонинг бундай тез-тез ўзгарувчанлиги боис аксарият инсонлар мавсумга мос кийинишга етарлича эътибор қаратмайди. Қолаверса, бундай иқлим шароитида хонадонлар ва ёпиқ бино-иншоотларда ҳаво алмашинуви камайиши ҳисобига атмосферада вируслар концентрацияси ошиши кузатилади.
“Биламизки, респиратор хасталикларни келтириб чиқарадиган вирусларнинг турлари жуда кўп. Грипп, парагрипп, реновирус, аденовирус, ҳатто коронавирус инфекциялари шулар жумласидан. Шу сабабли ҳозир кузатилаётган ўткир респиратор вирусли инфекцияларни табиий ҳолат деб қабул қилиш зарур”, деб таъкидлади Нурмат Отабеков.
Мутахассис иммунитет мустаҳкамлигини таъминлаш учун мева-сабзавотлар, турли кўкатлар ва қайнатмалар истеъмол қилиш ҳамда мавсумга мос кийинишни тавсия этди ва мавсумий респиратор касалликлар тарқалишининг олдини олишга эътиборли бўлишга чақирди.
2025 йил январь ойи бошларида Республика педиатрия маркази бемор болалар билан тўлгани, уларнинг бир қисми янги вирусга чалингани айтилган хабарлар тарқалганди. Соғлиқни сақлаш вазирлиги марказ юқумли касалликларга чалинган беморларни қабул қилиш ва даволашга ихтисослаштирилмаганини билдириб, тарқалган хабарлар мутлақо асоссиз эканини маълум қилганди.
Изоҳ (0)