Ijtimoiy tarmoqlarda Xorazm viloyati Qo‘shko‘pir tumanidagi bog‘chalarning birida tarbiyachilarning bolalarni qarg‘agani aks etgan videolavha tarqaldi. Holat Xorazm viloyati Maktabgacha va maktab ta’limi boshqarmasi ishchi guruhi tomonidan o‘rganildi.
Unga ko‘ra, videolavhada aks etgan holat joriy yil 18-sentyabr kuni Qo‘shko‘pir tumanidagi 39-son davlat maktabgacha ta’lim tashkilotida sodir bo‘lgan. O‘rganish davomida mazkur Davlat maktabgacha ta’lim tashkilotining 2-o‘rta guruh tarbiyachisi M.B. o‘zining mobil qurilmasida tarbiyalanuvchilar bilan shug‘ullanayotib, jarayonni videotasvirga olgani va bexosdan shu guruh ota-onalari uchun ochilgan maxsus Telegram guruhiga joylagani aniqlandi.
Ishchi guruh tomonidan tashkilot xodimlari o‘rtasida sodir bo‘lgan holat yuzasidan tushuntirish ishlari olib borilib, qayta shunday holatlar sodir bo‘lsa qonuniy chora ko‘rilishi yuzasidan ogohlantirildi.
Holatga sababchi bo‘lgan tarbiyachi M.B. esa qilgan ishidan pushaymon ekanini bildirib, mazkur guruh ota-onalaridan uzr so‘ragan va o‘z xohishiga ko‘ra ishdan bo‘shagan.
Bundan avval Buxoro viloyati Olot tumanida erkak o‘g‘li bilan urishgan 5 yashar bolani kaltaklagani haqida xabar berilgandi. Shuningdek, Andijondagi bog‘chada tarbiyachi bolaning yuziga bir necha bor tarsaki tushirgani to‘g‘risida xabar berilgandi.
Izoh (0)