Toshkent shahridagi bog‘chalardan birida 6 yoshli bolaga qizlar kiyimini kiydirib, ayollar raqsini ijro ettirgan bog‘cha tarbiyachisi ishdan bo‘shatildi. Bu haqda bolalar ombudsmani xabar berdi.
Maʼlum qilinishicha, bolalar ombudsmaniga Yunusobod tumanida yashovchi I.K. murojaat qilgan. Murojaatida 2016-yilda tug‘ilgan o‘g‘li Y.K. Toshkent shahridagi Mirobod tumani MTT tarbiyalanuvchisi ekanligini maʼlum qilgan.
Taʼkidlanishicha, 2022-yilda tarbiyachi o‘g‘liga qizlar kiyimini kiydirib, lab va yuzlarini bo‘yab, ayollar raqsini ijro ettirgan. Murojaatchi bu bilan o‘g‘lining shaʼni va qadr-qimmati kamsitilgani, bunday sahna ko‘rinishlari haqida uni ota sifatida ogohlantirmay, ruxsati olinmaganini aytgan.
Ota ushbu voqeadan Telegram orqali kelgan foto va videotasvirlardan xabar topgan.
Bolalar ombudsmani so‘rovi asosida mazkur holat Maktabgacha va maktab taʼlimi vazirligi tomonidan o‘rganildi. O‘rganish natijalariga ko‘ra, Y.K. qatnashgan tadbirda sahna ko‘rinishini tashkillashtirgan tarbiyachi X.Q. ekanligi va bolaga oid bu sahna xususiyatlari yuzasidan otadan ruxsat olmagani aniqlangan.
Tarbiyachiga nisbatan Mehnat kodeksining 157-moddasi (Mehnat shartnomasini taraflarning kelishuviga ko‘ra bekor qilish) bilan mehnat shartnomasi bekor qilindi.
Izoh (0)