Тошкент шаҳрида жойлашган хусусий боғчалардан бирида тарбиячи болани уриб, ҳақоратлади. Бу ҳақда болалар омбудсмани хабар берди.
Маълум қилинишича, болалар омбудсманига Тошкент шаҳрида яшовчи И.Н. ва Б.Н. (ота-она) мурожаат этди. Улар ўз мурожаатида 2021 йилда туғилган фарзанди хусусий мактабгача таълим муассасасида тарбияланишини, 29 июнь куни навбатчи тарбиячи Ш.К. (аёл) фарзандини уриб, ҳақоратлаганини билдирган.
Айтилишича, ота-она ҳолат юзасидан муассаса мудирасига мурожаат қилиб, видеотасвир нусхасини олмоқчи бўлганида мудира томонидан рухсат берилмаган ва тарбиячига нисбатан ҳеч қандай чора кўрилмаган.
Болалар омбудсманининг Мактабгача ва мактаб таълими вазирлигига сўрови асосида мазкур ҳолат вазирлик мутасаддилари томонидан ўрганилди. Ўрганиш натижасида боғча тарбиячиси Ш.К.га нисбатан ҳайфсан интизомий жазо чораси қўлланилди.
Шунингдек, муассасанинг кейинги фаолияти давомида болаларга тазйиқ ҳолатларига йўл қўймаслик устидан вазирлик тизимли назорат қилиши билдирилди.
Аввалроқ Бухорода фарзандини муттасил калтаклаб, қийнаб келган аёл 3 йилга қамалгани, Самарқандда боғчадаги болалардан бири 3 ёшли қизнинг қўлларидан тишлаб, жароҳат етказгани, Андижондаги боғчада тарбиячи боланинг юзига бир неча бор тарсаки туширгани тўғрисида хабар берилганди.
Изоҳ (0)