Toshkent shahrida joylashgan xususiy bog‘chalardan birida tarbiyachi bolani urib, haqoratladi. Bu haqda bolalar ombudsmani xabar berdi.
Ma’lum qilinishicha, bolalar ombudsmaniga Toshkent shahrida yashovchi I.N. va B.N. (ota-ona) murojaat etdi. Ular o‘z murojaatida 2021-yilda tug‘ilgan farzandi xususiy maktabgacha ta’lim muassasasida tarbiyalanishini, 29-iyun kuni navbatchi tarbiyachi Sh.K. (ayol) farzandini urib, haqoratlaganini bildirgan.
Aytilishicha, ota-ona holat yuzasidan muassasa mudirasiga murojaat qilib, videotasvir nusxasini olmoqchi bo‘lganida mudira tomonidan ruxsat berilmagan va tarbiyachiga nisbatan hech qanday chora ko‘rilmagan.
Bolalar ombudsmanining Maktabgacha va maktab ta’limi vazirligiga so‘rovi asosida mazkur holat vazirlik mutasaddilari tomonidan o‘rganildi. O‘rganish natijasida bog‘cha tarbiyachisi Sh.K.ga nisbatan hayfsan intizomiy jazo chorasi qo‘llanildi.
Shuningdek, muassasaning keyingi faoliyati davomida bolalarga tazyiq holatlariga yo‘l qo‘ymaslik ustidan vazirlik tizimli nazorat qilishi bildirildi.
Avvalroq Buxoroda farzandini muttasil kaltaklab, qiynab kelgan ayol 3 yilga qamalgani, Samarqandda bog‘chadagi bolalardan biri 3 yoshli qizning qo‘llaridan tishlab, jarohat yetkazgani, Andijondagi bog‘chada tarbiyachi bolaning yuziga bir necha bor tarsaki tushirgani to‘g‘risida xabar berilgandi.
Izoh (0)