Ижтимоий тармоқларда Тошкент шаҳар Юнусобод туманидаги хусусий боғчалардан бирида болаларни овқат емагани учун скотчлашгани ҳақида видео тарқалганди. Ҳолат юзасидан Тошкент шаҳар мактабгача ва мактаб таълими бошқармаси маълумот берди.
Унга кўра, Юнусобод туманидаги First Daycare хусусий мактабгача таълим ташкилотида 2025 йил 21 февраль куни тарбиячи С.А. ва тарбиячи ёрдамчиси Х.М. тарбияланувчилардан бирини овқат емагани учун стулга скотчлагани аниқланган.
Ташкилот маъмурияти тарбиячи С.А., тарбиячи ёрдамчиси Х.М.лар билан тузилган меҳнат шартномаларини бекор қилган ва улар ишдан бўшатилган. Айни пайтда юқоридаги ҳолат юзасидан туман прокуратураси томонидан суриштирув-ўрганиш ишлари олиб борилмоқда.
Боғчалардаги шу каби ҳолатлар
Бундан аввал Сирдарёдаги боғчада 6 ёшли боланинг танасига игна санчиб, таҳдид қилинган эди. Шунингдек,
- Нукусдаги хусусий боғчада болаларга қўполлик қилингани аниқланди
- Сергелидаги боғчада тарбиячининг калтаклаши оқибатида боланинг оёғи синди
- Тошкентда 6 ёшли болага қизлар кийимини кийдириб, аёллар рақсини ижро эттирган боғча тарбиячиси ишдан бўшатилди
- Хоразмда тарбиячи болаларни қарғаган видеосини адашиб ота-оналар гуруҳига жўнатиб юборди
- Тошкентдаги хусусий боғчада тарбиячи болани уриб, ҳақоратлади
- Сурхондарёдаги боғчада 5 ёшли болани урган тарбиячи ишдан олинди
- Жиззахда 3 ёшли боғча боласининг ўлимига сабабчи бўлганларга суд ҳукми ўқилди
Бундан ташқари, Самарқандда боғчадаги болалардан бири 3 ёшли қизнинг қўлларидан тишлаб, жароҳат етказгани, Андижондаги боғчада тарбиячи боланинг юзига бир неча бор тарсаки туширгани тўғрисида хабар берилганди.
Изоҳ (0)