Тошкент шаҳридаги боғчалардан бирида 6 ёшли болага қизлар кийимини кийдириб, аёллар рақсини ижро эттирган боғча тарбиячиси ишдан бўшатилди. Бу ҳақда болалар омбудсмани хабар берди.
Маълум қилинишича, болалар омбудсманига Юнусобод туманида яшовчи И.К. мурожаат қилган. Мурожаатида 2016 йилда туғилган ўғли Я.К. Тошкент шаҳридаги Миробод тумани МТТ тарбияланувчиси эканлигини маълум қилган.
Таъкидланишича, 2022 йилда тарбиячи ўғлига қизлар кийимини кийдириб, лаб ва юзларини бўяб, аёллар рақсини ижро эттирган. Мурожаатчи бу билан ўғлининг шаъни ва қадр-қиммати камситилгани, бундай саҳна кўринишлари ҳақида уни ота сифатида огоҳлантирмай, рухсати олинмаганини айтган.
Ота ушбу воқеадан Telegram орқали келган фото ва видеотасвирлардан хабар топган.
Болалар омбудсмани сўрови асосида мазкур ҳолат Мактабгача ва мактаб таълими вазирлиги томонидан ўрганилди. Ўрганиш натижаларига кўра, Я.К. қатнашган тадбирда саҳна кўринишини ташкиллаштирган тарбиячи Х.Қ. эканлиги ва болага оид бу саҳна хусусиятлари юзасидан отадан рухсат олмагани аниқланган.
Тарбиячига нисбатан Меҳнат кодексининг 157-моддаси (Меҳнат шартномасини тарафларнинг келишувига кўра бекор қилиш) билан меҳнат шартномаси бекор қилинди.
Изоҳ (0)