Новосибирск вилоятида эркак Томскдан Адлерга кетаётган поездда йўловчиларга пичоқ билан ҳужум қилди. Бу ҳақда Ички ишлар вазирлиги вакили Ирина Волк хабар берди.
Маълум қилинишича, эркак пичоқ билан икки йўловчига ҳужум қилган, оқибатда эркак ва аёл жароҳатланган. Поезд Барабинск станциясига етиб келгач, воқеа жойига полиция чақирилган. Йўловчилар вагондан эвакуация қилинган, эркак эса қўлга олинган.
Жабрланганлар шифохонага етказилган. Эркак жиноятга тайёргарлик кўриш, қотилликка суиқасд қилишда айбланмоқда. Унга қарши Россия Жиноят кодексининг 30 ва 105-моддалари бўйича иш қўзғатилган.
Россияда 13 январда ҳам пичоқ билан одамларга ҳужум қилинганди. Ҳодиса Красноярк шаҳридаги халқаро аэропортда юз берган. Ўзбекистон фуқароси 39 ёшли жабрланувчига пичоқ билан бир неча бор зарба берган. У икки нафар гувоҳ ва етиб келган полициячилар томонидан қўлга олинган. Жабрланувчи шифохонага олиб кетилганди.
Ҳужум қилган эркак 40 ёшли ўзбекистонлик экани аниқланган, у хатти-ҳаракатининг сабабини изоҳлай олмаган. Эркак пичоқни терминал кафеларидан бирида олган. Сўроқ пайтида у маст ҳолатда бўлганини билдирган. Ўзбекистон фуқароси ҳужум содир бўлишидан икки кун олдин уйига учиб кетиш учун Краснояркка келган.
Изоҳ (0)