«Қазақстан темир жоли» АЖ билан келишилган ҳолда йўловчи ташувчи поезд қатновлари қайта тикланмоқда, деб хабар бермоқда «Ўзбекистон темир йўллари».
Қайд этилишича, 15 май куни 647/648-сонли Нукус—Бейнеу—Нукус йўналишидаги йўловчи поездининг қатновни бошланади. Шунингдек, 16 майдан бошлаб Олмаота-2—Тошкент—Олмаота-2 йўналишида 1/2-сонли («Тулпар-Талго») поезд қатнови йўлга қўйилади. Юқорида кўрсатилган рейсларнинг даврийлиги Тошкентдан ҳафтасига 3 марта амалга оширилади.
Бошқа қўшни давлатлар билан темир йўл йўналишларининг қайта тикланиши томонларнинг келишувига асосан босқичма босқич очилиши кутилмоқда.
Қозоғистон ва Ўзбекистон давлат чегараси орқали ўтиш пунктларида белгиланган тартибда ўрнатилган чеклов чоралари талабларига риоя қилиш лозим. Хусусан, қўшни давлат чегараси орқали ўтиш пунктлари орқали Қозоғистонга келган барча шахслар ПЗР усули билан COVID-19 га тест синовидан ўтгани ҳақида маълумотнома тақдим этиши шарт (қозоқ, рус ёки инглиз тилида). Мазкур маълумотнома Қозоғистон давлат чегарасидан ўтишдан олдин камида 72 соатдан кўп бўлмаган муддатда бўлиши шарт.
Маълумотнома талаб қилинмайдиган шахслар:
- 5 ёшгача бўлган болалар, агар уларни кузатувчи (бирга бўлган) шахсда ушбу маълумотнома мавжуд бўлса;
- Қозоғистон Республикаси ҳукумат делегациялари аъзолари,
- локомотив бригадалари, темир йўл, денгиз ва дарё транспорти орқали ташишларда фаолият олиб бораётган шахслар;
- Қозоғистонда COVID-19 га қарши ревакцинация ёки тўлиқ эмлаш курсини олган шахслар (агар иккинчи компонентни олганидан сўнг Қозоғистон чегарасини кесиб ўтиш вақтида 6 ойдан ошмаса);
- Қозоғистон Бош давлат санитария врачи қарорига кўра мамлакат ҳудудида ҳақиқий деб топилган COVID-19 га қарши эмлаш учун паспорт/сертификат/маълумотнома берган шахсларга.
Тана ҳарорати юқори бўлган шахслар аниқланган ҳолатларда, маълумотноманинг мавжудлигидан қатъи назар, юқумли шифохонада изоляция қилинади.
Эслатиб ўтамиз, 2020 йилнинг март ойида COVID-19 коронавирус пандемияси туфайли қарийб бутун дунё мамлакатларда халқаро йўналишидаги йўловчи поезд қатновлари тўхтатилди. Икки йиллик чекловлардан сўнг, қатор давлатлар томонидан йўловчи поезд йўловчилари учун чегараларни босқичма-босқич очиш борасида саъйи-ҳаракатлар амалга оширила бошланди.
Ўзбекистон—Қозоғистон темир йўл қатновларининг тикланиш жараёни
Ўзбекистонда илк бор коронавирус аниқланган 2020 йил 16 мартдан бошлаб темир йўл транспорти қатновлари тўхтатилган эди. 2020 йилнинг 15 августидан маҳаллий авиа ва темир йўл қатновлари босқичма-босқич тикланган. Икки йиллик чекловлардан сўнг, қатор давлатлар томонидан поезд йўловчилари учун давлат чегараларини босқичма-босқич очиш борасида саъй-ҳаракатлар бошланган. Биринчи халқаро йўловчи поезди 1 апрель кунидан бошлаб Нукус—Бейнеу—Нукус йўналиши бўйича қатнай бошлаши хабар қилинганди. Шунингдек, 2 майдан бошлаб ҳафтада уч маротаба Олмаота-2—Тошкент—Олмаота-2 йўналишида 1/2-сонли поезд қатнови йўлга қўйилиши ҳам режалаштирилганди. Март ойи сўнггида Қозоғистонда карантин чекловлари жорий этилгани сабаб Нукус—Бейнеу ва Тошкент—Олмаота йўналишидаги халқаро йўловчи поездлари қатновини бошлаш санаси номаълум муддатга кўчирилганди.
Изоҳ (0)