Тошкент метрополитени вагон паркига 4 февраль куни янги 3 та метро поездлари олиб келинди, деб хабар бермоқда метрополитен матбуот хизмати.
Ушбу ҳаракат таркиблари белгиланган йўриқномага асосан, 7-10 кун давомида техник синовдан ўтказилиб, сўнгра хизмат кўрсатиш учун йўналишларга чиқарилади.
Қайд этилишича, февраль ойи давомида яна шу турдаги 3 та метро поездлари олиб келиниши режаланган. Бу режавий ишлар натижасида, метро вагон паркларини янгилаш ва белгиланган вақт интервалларини янада қисқартишга эришиш мақсад қилинган.
11 январь куни Тошкент метрополитенига янги тўрт вагонли 3 та замонавий метро поездлари олиб келинганди. 2024 йил 31 декабрь куни ҳам 3 та янги ҳаракат таркиби — 12 та метро вагони келтирилганди.
Транспорт вазирлиги берган маълумотга кўра, 2017 йилдан 2019 йилгача 36 та поезд эксплуатация қилинган. 2024 йилга келиб уларнинг сони 65 тага етказилди. 2025 йил якунига қадар 26 та замонавий таркиб харид қилиниши режалаштирилган.
Изоҳ (0)