Марғилон шаҳрида темирйўлдан ўтиб кетмоқчи бўлган Nexia-3 ни юк поезди уриб юборди. Ҳодисадан сўнг акс этган видеолар ижтимоий тармоқларда тарқалди.
Бош прокуратура ахборот хизмати раҳбари Ҳаёт Шамсутдиновнинг “Дарё”га маълум қилишича, воқеа 19 февраль куни соат 22:35 ларда юз берган. Қўқон локомотив депосига қарашли, Ахтачи—Қўқон йўналишидаги юк поезди таркибида 102 та бўш вагон билан ҳаракатланаётганида қўриқланадиган темирйўл кесишмасидан ўз эҳтиётсизлиги оқибатида ўтиб кетаётган Nexia-3 ни уриб юбориб, тўхтаган.
Ҳодиса натижасида 38 ёшли ҳайдовчи А.Й. бош ва қўл қисмидан енгил жароҳат олган ва Марғилон шаҳар Тез тиббий ёрдам марказига юборилган. Автомобиль техник шикастланган.
Айни пайтда Фарғона вилояти транспортда хавфсизликни таъминлаш бошқармаси ТБ томонидан терговга қадар текширув олиб борилмоқда.
2024 йилнинг декабрида Тошкент вилоятидаги Далагузар—Назарбек темирйўл кесишмасида Damas’ни поезд уриб юборганди. Бухорода 2023 йилнинг апрелида поезд Lacetti’ни, ўша йилнинг июнида Shacman юк машинасини уриб юборганди.
Изоҳ (0)