Тошкент метрополитенида 2024 йилнинг январь—декабрь ойларида жами 270,3 млн нафар йўловчи ташилган. Бу ҳақда Статистика агентлиги хабар берди.
Маълум қилинишича, ушбу кўрсаткич 2023 йилга нисбатан 98,3 млн нафар йўловчига ёки 57,2 фоизга ўсган.
Ушбу кўрсаткич йиллар кесимида қуйидагича:
- 2020 йил — 38,8 млн нафар;
- 2021 йил — 101,8 млн нафар;
- 2022 йил — 136,7 млн нафар;
- 2023 йил — 172 млн нафар;
- 2024 йил — 270,3 млн нафар.
Тошкент метросидаги ўзгаришлар
Аввалроқ 11 январь куни Тошкент метрополитенига яна янги тўрт вагонли 3 та замонавий метро поездлари олиб келинганди.
2024 йил 31 декабрь куни Тошкент метроси учун 3 та янги ҳаракат таркиби — 12 та метро вагони олиб келингани хабар қилинганди.
Транспорт вазирлиги берган маълумотга кўра, 2017 йилдан 2019 йилгача 36 та поезд эксплуатация қилинган. 2024 йилга келиб уларнинг сони 65 тага етказилди. 2025 йил якунига қадар яна 26 та замонавий таркиб харид қилиниши режалаштирилган.
Сўнгги вақтларда метро хизматига бўлган талаб кун сайин ортиб бормоқда. Тошкент метрополитени 16 декабрь куни биринчи марта бир кунда 1 миллион йўловчига хизмат кўрсатди.
Миллионинчи йўловчига жамоат транспортидан бир йил давомида бепул фойдаланиш имконини берувчи транспорт картаси совға қилинди.
Изоҳ (0)