Самарқанд вилоятнинг Жомбой туманидан Ургутга томон темир йўл йўл тармоғи тортилади, деб хабар бермоқда вилоят ҳокимлиги матбуот хизмати.
Шавкат Мирзиёев Самарқанд вилоятининг иқтисодий салоҳиятини янада ошириш, “Ургут” эркин иқтисодий зонасидаги корхоналарнинг экспорт ва импорт операцияларини амалга ошириш имкониятларини кенгайтириш мақсадида Ургут туманига темирйўл тармоғи тортиш ташаббусини илгари сурган эди. Ана шу мақсад асосида вилоятнинг Жомбой туманидан Ургутга томон темирйўл қурилиши бошланди.
Узунлиги 50 километрдан ортиқ бўлган янги тармоқ “Тоштемирйўллойиҳа” масъулияти чекланган жамияти томонидан ишлаб чиқилган бош режа бўйича замонавий муҳандислик ечимлари ҳисобга олинган ҳолда барпо этилади.
“Масад Ургут туманининг эркин иқтисодий зоналарини ривожлантириш, келажакда одамларга қулайлик яратиш”, дейди “Темирйўл лойиҳаси” МЧЖ директори Расулжон Рўзиев.
Жомбой туманидаги “MAN” заводи яқинидан бошланувчи янги темирйўл тармоғи 4Р-238 автомобиль йўлини кесиб, Зарафшон дарёси бўйлаб ўтади ва сўнгра ушбу дарё устида барпо этиладиган кўприк орқали Ургут туманига боради.
Темирйўл ўтадиган Жомбой, Самарқанд, Тойлоқ ва Ургут туманларининг аҳоли гавжум ҳудудларида бекатлар ташкил этилади. Масалан, Тожикистон билан чегарадош Ургут туманида жойлашган “Жартепа” чегара божхона пости яқинида бекат қурилади. Бу эса тожикистонликларга Ўзбекистон бўйлаб темирйўл орқали ҳам саёҳат қилиш имконини беради.
Темирйўлга тамал тоши қўйиш тадбирида қатнашган транспори вазири Илҳом Маҳкамов, Самарқанд вилояти ҳокими вазифасини бажарувчи Адиз Бобоев ва бошқа масъуллар янги тармоқ ҳудудда жойлашган аҳоли узоғини яқин қилиш билан биргаликда ишлаб чиқарилган юқори сифатли маҳсулотларни хориж бозорига экспорт қилиш имкониятини ҳам оширишини таъкидлади.
Аввалроқ Паркентдан Тошкент шаҳригача салкам 24 километр узунликдаги темирйўл барпо этилаётгани ҳақида хабар берилган эди. Янги йўналишни лойиҳалаш ишлари “Боштранслойиҳа” АЖ, қурилиш ишлари эса темирйўлчи мутахассислар томонидан амалга оширилади. Туман марказидаги кўприк реконструкция қилиняпти.
2025 йил 20 январдан Амударё устидан ўтувчи янги кўприкда Урганч—Қўнғирот—Урганч йўналиши бўйича янги поезд қатнови йўлга қўйилганди.
Изоҳ (0)